نظر میں بس گئے ہو تم تو چھپ جانے سے کیا ہو گا

نظر میں بس گئے ہو تم تو چھپ جانے سے کیا ہو گا

کوئی پردہ نہیں اب پردہ دیوانے سے کیا ہو گا

کلیسا میں حرم میں دیر میں جانے سے کیا ہو گا

کرم ہو گا نہ جب تک ان کا دیوانے سے کیا ہو گا

مزا جب ہے کہ دم نکلے تمہارے آستانے پر

تمہاری یاد میں بے موت مر جانے سے کیا ہو گا

چراغ حسن بن کر عشق کی راہیں سجا دیجے

اکیلے منزل الفت میں کھو جانے سے کیا ہو گا

دل ناداں نہ آئے ہاتھ میں گر یار کا دامن

جنون عشق میں دیوانہ بن جانے سے کیا ہو گا

تمنا ہے اگر اس کی تو اس کے نام پہ مٹ جا

تلاش یار میں یوں ٹھوکریں کھانے سے کیا ہو گا

فناؔ یہ سوچ کر اس کے کرم سے لو لگائی ہے

وہی کام آئے گا میرے کہیں جانے سے کیا ہو گا