tera karam sharik-e-mohabbat sada raha

terā karam sharīk-e-mohabbat sadā rahā

terī 'atāoñ se mirā dāman bharā rahā

jaisā rahā jahāñ bhī rahā jis jagah rahā

dil kī nazar se terī taraf dekhtā rahā

ye bhī tire karam tirī rahmat kī baat hai

tere dar-e-karam se mujhe vāsta rahā

kā'ba nigāh-e-rashk se dekhā kiyā mujhe

sar āstān-e-yār pe merā jhukā rahā

pā-e-sanam pe hotī rahī 'ishq kī namāz

sajda hamārā hāsil-e-kā'ba banā rahā

kam ho sakī na sham'-e-mohabbat kī raushnī

terā jamāl merī nazar meñ basā rahā

rāhoñ kī saḳhtiyoñ se pareshāñ huā na maiñ

har rāste meñ tū mirā mushkil-kushā rahā

mujh ko 'fanā' payām-e-baqā thā har ek saañs

jab tak sharīk-e-hāl karam yaar kā rahā

tera karam sharik-e-mohabbat sada raha

teri 'ataon se mera daman bhara raha

jaisa raha jahan bhi raha jis jagah raha

dil ki nazar se teri taraf dekhta raha

ye bhi tere karam teri rahmat ki baat hai

tere dar-e-karam se mujhe wasta raha

ka'ba nigah-e-rashk se dekha kiya mujhe

sar aastan-e-yar pe mera jhuka raha

pa-e-sanam pe hoti rahi 'ishq ki namaz

sajda hamara hasil-e-ka'ba bana raha

kam ho saki na sham'-e-mohabbat ki raushni

tera jamal meri nazar mein basa raha

rahon ki saKHtiyon se pareshan hua na main

har raste mein tu mera mushkil-kusha raha

mujh ko 'fana' payam-e-baqa tha har ek sans

jab tak sharik-e-haal karam yar ka raha