zulf-e-saqi jo pareshan hui shane par

zulf-e-sāqī jo pareshān huī shāne par

chhā ga.ī kaalī ghaTā jhuum ke mai-ḳhāne par

chhā gayā rañg-e-junūñ 'ishq ke afsāne par

saarī duniyā kī nazar hai tire dīvāne par

jalva dikhlā ke tu ḳhud chhīn liye hosh-o-havās

baat aa.ī bhī to aa.ī tire dīvāne par

us kī tauba ko bhalā kaun bachā.e saaqī

jis kī nazreñ hoñ chhalakte hue paimāne par

āsmāñ laakh girātā rahe bijlī lekin

āshiyāñ ham bhī banā.eñge bahār aane par

mast-o-be-ḳhud hī rahūñ hosh na aa.e mujh ko

ik nazar Daal de aisī mire paimāne par

ai 'fanā' baa'd mire yaad karegī duniyā

qadr-e-insān huā kartī hai mar jaane par

zulf-e-saqi jo pareshan hui shane par

chha gai kali ghaTa jhum ke mai-KHane par

chha gaya rang-e-junun 'ishq ke afsane par

sari duniya ki nazar hai tere diwane par

jalwa dikhla ke tu KHud chhin liye hosh-o-hawas

baat aai bhi to aai tere diwane par

us ki tauba ko bhala kaun bachae saqi

jis ki nazren hon chhalakte hue paimane par

aasman lakh giraata rahe bijli lekin

aashiyan hum bhi banaenge bahaar aane par

mast-o-be-KHud hi rahun hosh na aae mujh ko

ek nazar Dal de aisi mere paimane par

ai 'fana' ba'd mere yaad karegi duniya

qadr-e-insan hua karti hai mar jaane par