زلفِ ساقی جو پریشان ہوئی شانے پر

زلفِ ساقی جو پریشان ہوئی شانے پر

چھا گئی کالی گھٹا جھوم کے میخانے پر

چھا گیا رنگِ جنوں عشق کے افسانے پر

ساری دنیا کی نظر ہے ترے دیوانے پر

جلوہ دکھلا کے تو خود چھین لیے ہوش و حواس

بات آئی بھی تو آئی ترے دیوانے پر

اس کی توبہ کو بھلا کون بچائے ساقی

جس کی نظریں ہوں چھلکتے ہوئے پیمانے پر

آسماں لاکھ گراتا رہے بجلی لیکن

آشیاں ہم بھی بنائیں گے بہار آنے پر

مست و بیخود ہی رہوں ہوش نہ آئے مجھ کو

اک نظر ڈال دے ایسی مرے پیمانے پر

اے فناؔ بعد مرے یاد کرے گی دنیا

قدرِ انسان ہوا کرتی ہے مر جانے پر