un ke qadam ko chumunga mil kar ghubar mein

un ke qadam ko chūmūñgā mil kar ġhubār meñ

ai 'ishq ḳhaak kar de mujhe kū-e-yār meñ

kaise dikhā.ūñ tum ko maiñ dil apnā chiir kar

baiThā huuñ maiñ mazār pe tum ho mazār meñ

aao kafan haTā ke mirā haal dekh lo

maiñ raah tak rahā huuñ tumhārī mazār meñ

duniyā to mujh se chhuT ga.ī tum bhī na aaoge

tanhā.iyoñ ne gher liyā hai mazār meñ

maiñ bhī tirā huuñ dil bhī tirā jaan bhī tirī

ab zindagī hai jānāñ tire iḳhtiyār meñ

tum ho nazar ke sāmne taarī hai be-ḳhudī

kaise nazar haTā.ūñ guloñ se bahār meñ

āñkheñ taras rahī haiñ tajallī ke vāste

kab tak rahoge mahv tum apne siñghār meñ

maz.hab yahī hai merā 'fanā' diin bhī yahī

ho jā.ūñ ḳhaak miT ke tumhāre dayār meñ

un ke qadam ko chumunga mil kar ghubar mein

ai 'ishq KHak kar de mujhe ku-e-yar mein

kaise dikhaun tum ko main dil apna chir kar

baiTha hun main mazar pe tum ho mazar mein

aao kafan haTa ke mera haal dekh lo

main rah tak raha hun tumhaari mazar mein

duniya to mujh se chhuT gai tum bhi na aaoge

tanhaiyon ne gher liya hai mazar mein

main bhi tera hun dil bhi tera jaan bhi teri

ab zindagi hai jaanan tere iKHtiyar mein

tum ho nazar ke samne tari hai be-KHudi

kaise nazar haTaun gulon se bahaar mein

aankhen taras rahi hain tajalli ke waste

kab tak rahoge mahw tum apne singhaar mein

mazhab yahi hai mera 'fana' din bhi yahi

ho jaun KHak miT ke tumhaare dayar mein