شباب تیرا یہ کہہ رہا ہے، گناہ یہ بار بار کر لوں

شباب تیرا یہ کہہ رہا ہے، گناہ یہ بار بار کر لوں

نظر سے تیرے لبوں کو چوموں، حسین زلفوں سے پیار کر لوں

نظر سے میری نظر ملا کر، کبھی چلے جو تم مسکرا کر

تمہارے تیرِ نظر کو دلبر! میں خود کلیجے سے پار کر لوں

متاعِ ہوش و خرد لٹا دوں، ڈبو دوں نشے میں زندگی کو

تری نظر مجھ سے کہہ رہی ہے کہ میکشی اختیار کر لوں

تو دیکھتا مجھ کو آزما کر، یہ ایک شب کی تو بات کیا ہے

اگر تو وعدہ کرے تو اے جاں! میں حشر تک انتظار کر لوں

تری جوانی گلاب جیسی، شراب ہے یہ شباب تیرا

جو بس چلے میرا، میرے دلبر! تجھے میں اپنا سنگھار کر لوں

فناؔ اگر وہ کریں اشارہ، بدل دوں عنوان زندگی کا

کہیں وہ دیوانہ مجھ کو ہنس کر میں پیراہن تار تار کر لوں