jazba-e-ishq mera hasil-e-iman kar de

jazba-e-ishq mirā hāsil-e-īmāñ kar de

mere mahbūb mire dard kā darmāñ kar de

parda chehre se haTā diid kā sāmāñ kar de

apne jalvoñ se tū kāfir ko musalmān karde

maiñ tire dar pe ye ummīd liye baiThā huuñ

ai sanam aaj mukammal mirā īmāñ kar de

aise 'āshiq kā har ik sajda hai takmīl-e-junūñ

jo dar-e-yār pe īmān ko qurbāñ kar de

merā maz.hab hai tire husn kī puujā karnā

terā mashrab hai har ik dard kā darmāñ kar de

tujh se nisbat hai mujhe terā parastār huuñ maiñ

mujh pe ik chashm-e-karam ai mire jānāñ kar de

mujh ko dīvāna banānā hai to is tarh banā

apne hāthoñ se mirā chāk-e-garebāñ kar de

maiñ huuñ darvesh tire dar kā mujhe ġhair se kyā

apne jaisā hī mujhe ai mire jānāñ kar de

ai 'fanā' gulshan-e-ummīd meñ aa.egī bahār

kūcha-e-'ishq ko sajdoñ se gulistāñ kar de

jazba-e-ishq mera hasil-e-iman kar de

mere mahbub mere dard ka darman kar de

parda chehre se haTa did ka saman kar de

apne jalwon se tu kafir ko musalman karde

main tere dar pe ye ummid liye baiTha hun

ai sanam aaj mukammal mera iman kar de

aise 'ashiq ka har ek sajda hai takmil-e-junun

jo dar-e-yar pe iman ko qurban kar de

mera mazhab hai tere husn ki puja karna

tera mashrab hai har ek dard ka darman kar de

tujh se nisbat hai mujhe tera parastar hun main

mujh pe ek chashm-e-karam ai mere jaanan kar de

mujh ko diwana banana hai to is tarh bana

apne hathon se mera chaak-e-gareban kar de

main hun darwesh tere dar ka mujhe ghair se kya

apne jaisa hi mujhe ai mere jaanan kar de

ai 'fana' gulshan-e-ummid mein aaegi bahaar

kucha-e-'ishq ko sajdon se gulistan kar de