faiz-e-nisbat se teri maine baDa paya hai

faiz-e-nisbat se tirī maiñ ne baḌā paayā hai

mere dāman meñ tire 'ishq kā sarmāyā hai

ab na jā.ūñgā kahīñ uTh ke maiñ tere dar se

khīñch kar terā karam mujh ko yahāñ laayā hai

kis tarah jān-e-vafā maiñ tirā dāman chhoḌūñ

maiñ ne dil de ke mirī jaan tujhe paayā hai

kyuuñ na us banda-navāzī pe fidā ho jā.ūñ

maiñ jahāñ huuñ mirī hastī pe tirā saayā hai

mere bhī ḳhāna-e-vīrāñ ko tajallī de de

tere jalvoñ ne to kaunain ko chamkāyā hai

manzil-e-dil se mujhe dair-o-haram tak ai dost

terā hī jalva ba-har gaam nazar aayā hai

apnī hastī pe gumāñ yaar kā hotā hai 'fanā'

jazba-e-ishq mujhe aaj kahāñ laayā hai

faiz-e-nisbat se teri main ne baDa paya hai

mere daman mein tere 'ishq ka sarmaya hai

ab na jaunga kahin uTh ke main tere dar se

khinch kar tera karam mujh ko yahan laya hai

kis tarah jaan-e-wafa main tera daman chhoDun

main ne dil de ke meri jaan tujhe paya hai

kyun na us banda-nawazi pe fida ho jaun

main jahan hun meri hasti pe tera saya hai

mere bhi KHana-e-viran ko tajalli de de

tere jalwon ne to kaunain ko chamkaya hai

manzil-e-dil se mujhe dair-o-haram tak ai dost

tera hi jalwa ba-har gam nazar aaya hai

apni hasti pe guman yar ka hota hai 'fana'

jazba-e-ishq mujhe aaj kahan laya hai