hum dar-e-yar pe yun yar ki puja karte

ham dar-e-yār pe yuuñ yaar kī puujā karte

kabhī marte kabhī jiite kabhī sajda karte

mere haq meñ yahī behtar yahī achchhā karte

apnā kah kar vo jahāñ meñ mujhe rusvā karte

kaash yuuñ 'ishq meñ takmīl-e-'ibādat hotī

sāmne baiTh ke ham aap ko dekhā karte

maiñ bhī bīmār-e-mohabbat huuñ mohabbat kī qasam

mujh pe bhī ek nazar mere masīhā karte

aañkh saaqī ne uThā.ī to sambhalne na diyā

kaise mai-ḳhvār bhalā 'ishq kā dā'va karte

ḳhalvat-e-'ishq meñ har roz tamāshā hotā

roz ham aap se īmān kā saudā karte

ai 'fanā' bā'd-e-fanā miltī hayāt-e-jāved

vo jo bīmār-e-ġham-e-hijr ko achchhā karte

hum dar-e-yar pe yun yar ki puja karte

kabhi marte kabhi jite kabhi sajda karte

mere haq mein yahi behtar yahi achchha karte

apna kah kar wo jahan mein mujhe ruswa karte

kash yun 'ishq mein takmil-e-'ibaadat hoti

samne baiTh ke hum aap ko dekha karte

main bhi bimar-e-mohabbat hun mohabbat ki qasam

mujh pe bhi ek nazar mere masiha karte

aankh saqi ne uThai to sambhalne na diya

kaise mai-KHwar bhala 'ishq ka da'wa karte

KHalwat-e-'ishq mein har roz tamasha hota

roz hum aap se iman ka sauda karte

ai 'fana' ba'd-e-fana milti hayat-e-jawed

wo jo bimar-e-gham-e-hijr ko achchha karte