tera shaida hun mere dard ka darman tu hai

terā shaidā huuñ mire dard kā darmāñ tū hai

merā maz.hab mirā kā'ba mirā īmāñ to hai

jān-e-jāñ jān-e-talab hāsil-e-darmāñ tū hai

mere jānāñ mirī taskīn kā sāmāñ tū hai

baiTh kar sāmne kyuuñ terī tilāvat na karūñ

ai sanam mere liye sūrat-e-qur.āñ tū hai

haram-o-dair meñ phirte haiñ tire saudā.ī

dil ke ā.īne meñ ai dost numāyāñ tū hai

sar jhukā.ūñ maiñ kahāñ shauq-e-'ibādat meñ sanam

mere sajdoñ kī haqīqat meñ to pinhāñ tū hai

soz-e-ulfat meñ jalā kar mujhe kāmil kar de

maiñ huuñ parvāna tirā sham'-e-farozāñ tū hai

maiñ 'fanā' ho ke bhī chhoḌūñgā na dāman terā

merī mahfil mirī ḳhalvat mere jānāñ tū hai

tera shaida hun mere dard ka darman tu hai

mera mazhab mera ka'ba mera iman to hai

jaan-e-jaan jaan-e-talab hasil-e-darman tu hai

mere jaanan meri taskin ka saman tu hai

baiTh kar samne kyun teri tilawat na karun

ai sanam mere liye surat-e-quran tu hai

haram-o-dair mein phirte hain tere saudai

dil ke aaine mein ai dost numayan tu hai

sar jhukaun main kahan shauq-e-'ibaadat mein sanam

mere sajdon ki haqiqat mein to pinhan tu hai

soz-e-ulfat mein jala kar mujhe kaamil kar de

main hun parwana tera sham'-e-farozan tu hai

main 'fana' ho ke bhi chhoDunga na daman tera

meri mahfil meri KHalwat mere jaanan tu hai