duniya ke hasin hum pe inayat nahin karte

duniyā ke hasīñ ham pe 'ināyat nahīñ karte

sūrat to dikhāte haiñ mohabbat nahīñ karte

tum ho ki sadā toḌte rahte ho jafā.eñ

ham haiñ ki kabhī tum se shikāyat nahīñ karte

un shoḳh hasīnoñ se kabhī dil na lagānā

ye shoḳh kisī se bhī muravvat nahīñ karte

vo haiñ ki raqīboñ se milā karte haiñ har roz

ham un ke sivā ġhair kī chāhat nahīñ karte

vo choT hasīnoñ kī mohabbat meñ lagī hai

ab aañkh milāne kī bhī himmat nahīñ karte

bīmār-e-shab-e-hijr kā dam aa gayā lab par

tum ho ki 'ilāj-e-shab-e-furqat nahīñ karte

tum kaise masīhā ho ki ik roz bhī aa kar

bīmār-e-shab-e-ġham kī 'iyādat nahīñ karte

jab dekho 'fanā' tum to hasīnoñ pe fidā ho

masjid meñ kabhī jā ke 'ibādat nahīñ karte

duniya ke hasin hum pe 'inayat nahin karte

surat to dikhate hain mohabbat nahin karte

tum ho ki sada toDte rahte ho jafaen

hum hain ki kabhi tum se shikayat nahin karte

un shoKH hasinon se kabhi dil na lagana

ye shoKH kisi se bhi murawwat nahin karte

wo hain ki raqibon se mila karte hain har roz

hum un ke siwa ghair ki chahat nahin karte

wo choT hasinon ki mohabbat mein lagi hai

ab aankh milane ki bhi himmat nahin karte

bimar-e-shab-e-hijr ka dam aa gaya lab par

tum ho ki 'ilaj-e-shab-e-furqat nahin karte

tum kaise masiha ho ki ek roz bhi aa kar

bimar-e-shab-e-gham ki 'iyaadat nahin karte

jab dekho 'fana' tum to hasinon pe fida ho

masjid mein kabhi ja ke 'ibaadat nahin karte