aag daman mein lag jaegi dil mein shoala machal jaega

aag dāman meñ lag jā.egī dil meñ sho'ala machal jā.egā

merā sāġhar na chhūnā kabhī sāqiyā haath jal jā.egā

ek din vo zarūr ā.eñge dard kā saaya Tal jā.egā

is zamāne kī parvā nahīñ ye zamāna badal jā.egā

aa gayā merā āñkhoñ meñ dam ab to jalva dikhā dījiye

aap kī baat rah jā.egī merā armāñ nikal jā.egā

be-sabab ham se rūTho na tum ye laḌā.ī burī chiiz hai

sulh kar lo ḳhudā ke liye ye burā vaqt Tal jā.egā

mai-kasho us nazar kī suno kah rahī hai vo sho’la-badan

mai nahīñ jaam meñ aag hai jo piyegā vo jal jā.egā

koī aañsū nahīñ aañkh meñ baat ghar kī abhī ghar meñ hai

tum jo yuuñ hī satāte rahe dard ashkoñ meñ Dhal jā.egā

duur haiñ jab talak tum se ham kaise hogā madavā-e-ġham

ek daf.a tum milo to sanam ġham ḳhushī meñ badal jā.egā

gar yuuñ hī ghar meñ baiThā rahā maar Dāleñgī tanhā.iyāñ

chal zarā mai-kade meñ chaleñ ai 'fanā' dil bahal jā.egā

aag daman mein lag jaegi dil mein sho'ala machal jaega

mera saghar na chhuna kabhi saqiya hath jal jaega

ek din wo zarur aaenge dard ka saya Tal jaega

is zamane ki parwa nahin ye zamana badal jaega

aa gaya mera aankhon mein dam ab to jalwa dikha dijiye

aap ki baat rah jaegi mera arman nikal jaega

be-sabab hum se ruTho na tum ye laDai buri chiz hai

sulh kar lo KHuda ke liye ye bura waqt Tal jaega

mai-kasho us nazar ki suno kah rahi hai wo sho’la-badan

mai nahin jam mein aag hai jo piyega wo jal jaega

koi aansu nahin aankh mein baat ghar ki abhi ghar mein hai

tum jo yun hi satate rahe dard ashkon mein Dhal jaega

dur hain jab talak tum se hum kaise hoga madawa-e-gham

ek dafa tum milo to sanam gham KHushi mein badal jaega

gar yun hi ghar mein baiTha raha mar Dalengi tanhaiyan

chal zara mai-kade mein chalen ai 'fana' dil bahal jaega