آگ دامن میں لگ جائے گی دل میں شعلہ مچل جائے گا

آگ دامن میں لگ جائے گی دل میں شعلہ مچل جائے گا

میرا ساغر نہ چھونا کبھی ساقیا ہاتھ جل جائے گا

ایک دن وہ ضرور آئیں گے درد کا سایہ ٹل جائے گا

اس زمانے کی پروا نہیں یہ زمانہ بدل جائے گا

آ گیا میرا آنکھوں میں دم اب تو جلوہ دکھا دیجیے

آپ کی بات رہ جائے گی میرا ارماں نکل جائے گا

بے سبب ہم سے روٹھو نہ تم یہ لڑائی بری چیز ہے

صلح کر لو خدا کے لیے یہ برا وقت ٹل جائے گا

مے کشو اس نظر کی سنو کہہ رہی ہے وہ شعلہ بدن

مے نہیں جام میں آگ ہے جو پیے گا وہ جل جائے گا

کوئی آنسو نہیں آنکھ میں بات گھر کی ابھی گھر میں ہے

تم جو یوں ہی ستاتے رہے درد اشکوں میں ڈھل جائے گا

دور ہیں جب تلک تم سے ہم کیسے ہوگا مداوائے غم

ایک دفعہ تم ملو تو صنم غم خوشی میں بدل جائے گا

گر یوں ہی گھر میں بیٹھا رہا مار ڈالیں گی تنہائیاں

چل ذرا مے کدہ میں چلیں اے فناؔ دل بہل جائے گا