mai-kada ban gain mast aankhen zulf kali ghaTa ho gai hai

mai-kada ban ga.iiñ mast āñkheñ zulf kaalī ghaTā ho ga.ī hai

kyā ho mai kā nasha zindagī meñ zindagī ḳhud nasha ho ga.ī hai

be-ijāzat laboñ ko tumhāre chuum kar ḳhud pareshān huuñ maiñ

hosh meñ itnī jur.at na hotī be-ḳhudī meñ ḳhatā ho ga.ī hai

pahle to dekhnā muskurānā phir nazar phernā ruuTh jaanā

ho gayā ḳhuun kitnoñ kā nāhaq aap kī to adā ho ga.ī hai

aisī chaltī hai galiyoñ meñ terī jhuum kar jaise chalte haiñ mai-kash

jab se zulfoñ ko terī chhuā hai kitnī be-ḳhud sabā ho ga.ī hai

be-davā mujh ko achchhā kiyā hai chāra-sāzī ke andāz dekho

muskurā kar nazar yuuñ uThā.ī dard-e-dil kī davā ho ga.ī hai

yuuñ rachā kaif nas-nas meñ merī miT ga.ī fikr-e-duniyā-o-'uqbā

jab se rakkhā qadam mai-kade meñ zindagī kyā se kiyā ho ga.ī hai

'ishq ne kyā tamāsha dikhāyā kaisī karvaT nasīboñ ne badlī

ai 'fanā' ham ko dīvāna kar ke vo nazar pārsā ho ga.ī hai

mai-kada ban gain mast aankhen zulf kali ghaTa ho gai hai

kya ho mai ka nasha zindagi mein zindagi KHud nasha ho gai hai

be-ijazat labon ko tumhaare chum kar KHud pareshan hun main

hosh mein itni jurat na hoti be-KHudi mein KHata ho gai hai

pahle to dekhna muskurana phir nazar pherna ruTh jaana

ho gaya KHun kitnon ka nahaq aap ki to ada ho gai hai

aisi chalti hai galiyon mein teri jhum kar jaise chalte hain mai-kash

jab se zulfon ko teri chhua hai kitni be-KHud saba ho gai hai

be-dawa mujh ko achchha kiya hai chaara-sazi ke andaz dekho

muskura kar nazar yun uThai dard-e-dil ki dawa ho gai hai

yun racha kaif nas-nas mein meri miT gai fikr-e-duniya-o-'uqba

jab se rakkha qadam mai-kade mein zindagi kya se kiya ho gai hai

'ishq ne kya tamasha dikhaya kaisi karwaT nasibon ne badli

ai 'fana' hum ko diwana kar ke wo nazar parsa ho gai hai