fana hona mohabbat mein hayat-e-jawedani hai

fanā honā mohabbat meñ hayāt-e-jāvedānī hai

kisī qātil pe dam nikle to lutf-e-zindagānī hai

zarā raftār to badlo ki dil pāmāl hotā hai

ye ham bhī jānte haiñ āmad-e-fasl-e-javānī hai

nashīlī mast āñkheñ surḳh Dore chaal matvālī

shabāb us gul kā goyā saaf tasvīr-e-javānī hai

naved-e-vasl sun kar daf'atan 'āshiq kā mar jaanā

mohabbat meñ ḳhushī kā naam marg-e-nā-gahānī hai

fanā ab tak na tai ham ne kiyā rāh-e-mohabbat ko

usī kūcha kī go ik 'umr ham ne ḳhaak chhānī hai

fana hona mohabbat mein hayat-e-jawedani hai

kisi qatil pe dam nikle to lutf-e-zindagani hai

zara raftar to badlo ki dil pamal hota hai

ye hum bhi jaante hain aamad-e-fasl-e-jawani hai

nashili mast aankhen surKH Dore chaal matwali

shabab us gul ka goya saf taswir-e-jawani hai

nawed-e-wasl sun kar daf'atan 'ashiq ka mar jaana

mohabbat mein KHushi ka nam marg-e-na-gahani hai

fana ab tak na tai hum ne kiya rah-e-mohabbat ko

usi kucha ki go ek 'umr hum ne KHak chhani hai