فنا ہونا محبت میں حیاتِ جاوِدانی ہے

فنا ہونا محبت میں حیاتِ جاوِدانی ہے

کسی قاتل پہ دم نکلے تو لطفِ زندگانی ہے

ذرا رفتار تو بدلو کہ دل پامال ہوتا ہے

یہ ہم بھی جانتے ہیں آمدِ فصلِ جوانی ہے

نشیلی مست آنکھیں سرخ ڈورے چال متوالی

شباب اس گل کا گویا صاف تصویرِ جوانی ہے

نویدِ وصل سن کر دفعتاً عاشق کا مر جانا

محبت میں خوشی کا نام مرگِ نا گہانی ہے

فناؔ اب تک نہ طے ہم نے کیا راہِ محبت کو

اسی کوچہ کی گو اک عمر ہم نے خاک چھانی ہے