صحن حرم وکوئے صنم چھوڑ دیا ہے

صحن حرم وکوئے صنم چھوڑ دیا ہے

ہر در کو ترے در کی قسم چھوڑ دیا ہے

وہ رند ہوں میں جس کے لئے شیخِ حرم نے

راتوں کو کھلا باب حرم چھوڑ دیا ہے

کر لیجئے توبہ کا یقیں حضرت واعظ

میخانہ کو ساقی کی قسم چھوڑ دیا ہے

غفلت مری جانب سے ہے یا ان کی طرف سے

یہ فیصلہ تجھ پر شبِ غم چھوڑ دیا ہے

ظالم تجھے یہ راز بتانا ہی پڑے گا

کیوں مشغلۂ مشقِ ستم چھوڑ دیا ہے

رودادِ وفا ان کی سنا دی ہے مکمل

ہاں تھوڑا سا افسانۂ غم چھوڑ دیا ہے

بیگانے تو بیگانے ہیں کیا بات ہے ساقی

اپنوں نے بھی بھرنا ترا دم چھوڑ دیا ہے

کس دور کا ہر شاعر نازک ہے سپاہی

تلوار اٹھا لی ہے قلم چھوڑ دیا ہے

کافی ہے فناؔ مجھ کو مرا جام شکستہ

دنیا کے لئے ساغرِ جم چھوڑ دیا ہے