sahan-e-haram-o-sanam chhoD diya hai

sahan-e-haram-o-sanam chhoḌ diyā hai

har dar ko tire dar kī qasam chhoḌ diyā hai

vo riñd huuñ maiñ jis ke liye shaiḳh-e-haram ne

rātoñ ko khulā baab haram chhoḌ diyā hai

kar lījiye tauba kā yaqīñ hazrat-e-vā'iz

mai-ḳhāna ko saaqī kī qasam chhoḌ diyā hai

ġhaflat mirī jānib se hai yā un kī taraf se

ye faisla tujh par shab-e-ġham chhoḌ diyā hai

zālim tujhe ye raaz batānā hī paḌegā

kyuuñ mashġhala-e-mashk-e-sitam chhoḌ diyā hai

rūdād-e-vafā un kī sunā dī hai mukammal

haañ thoḌā sā afsāna-e-ġham chhoḌ diyā hai

begāne to begāne haiñ kyā baat hai saaqī

apnoñ ne bhī bharnā tirā dam chhoḌ diyā hai

kis daur kā har shā’ir-e-nāzuk hai sipāhī

talvār uThā lī hai qalam chhoḌ diyā hai

kaafī hai fanā mujh ko mirā jām-e-shikasta

duniyā ke liye sāġhar-e-jam chhoḌ diyā hai

sahan-e-haram-o-sanam chhoD diya hai

har dar ko tere dar ki qasam chhoD diya hai

wo rind hun main jis ke liye shaiKH-e-haram ne

raaton ko khula bab haram chhoD diya hai

kar lijiye tauba ka yaqin hazrat-e-wa'iz

mai-KHana ko saqi ki qasam chhoD diya hai

ghaflat meri jaanib se hai ya un ki taraf se

ye faisla tujh par shab-e-gham chhoD diya hai

zalim tujhe ye raaz batana hi paDega

kyun mashghala-e-mashk-e-sitam chhoD diya hai

rudad-e-wafa un ki suna di hai mukammal

han thoDa sa afsana-e-gham chhoD diya hai

begane to begane hain kya baat hai saqi

apnon ne bhi bharna tera dam chhoD diya hai

kis daur ka har sha’ir-e-nazuk hai sipahi

talwar uTha li hai qalam chhoD diya hai

kafi hai fana mujh ko mera jam-e-shikasta

duniya ke liye saghar-e-jam chhoD diya hai