KHud barq ho aur tur-e-tajalla se guzar ja

ḳhud barq ho aur tūr-e-tajalla se guzar jā

ḳhud sho.ala ban aur vādī-e-sīnā se guzar jā

be-vāsta-e-kHud-nagarī apnī taraf dekh

ā.īna uThā husn-e-ḳhud-ārā se guzar jā

apnī hī nigāhoñ kā ye nazzārā kahāñ tak

is marhala-e-sa'ī-e-tamāsha se guzar jā

zarre meñ hai gum vus'at-e-sad 'ālam-e-sahrā

zarre ko samajh vus'at-e-sahrā se guzar jā

ki qat-e’-nazar vasvasa-e-qalb-o-nazar se

har jalva-e-poshīda-o-paida se guzar jā

ka.aba ho ki ho dair vo duniyā ho ki 'uqbā

har manzil-o-har jāda-o-har jā se guzar jā

kashtī kā sahārā hī to girdāb hai 'fānī'

dariyā hī meñ tū Duub ke dariyā se guzar jā

KHud barq ho aur tur-e-tajalla se guzar ja

KHud shoala ban aur wadi-e-sina se guzar ja

be-wasta-e-kHud-nagari apni taraf dekh

aaina uTha husn-e-KHud-ara se guzar ja

apni hi nigahon ka ye nazzara kahan tak

is marhala-e-sa'i-e-tamasha se guzar ja

zarre mein hai gum wus'at-e-sad 'alam-e-sahra

zarre ko samajh wus'at-e-sahra se guzar ja

ki qat-e’-nazar waswasa-e-qalb-o-nazar se

har jalwa-e-poshida-o-paida se guzar ja

kaba ho ki ho dair wo duniya ho ki 'uqba

har manzil-o-har jada-o-har ja se guzar ja

kashti ka sahaara hi to girdab hai 'fani'

dariya hi mein tu Dub ke dariya se guzar ja