ye zid hai aaj unhen be-naqab dekhenge

ye zid hai aaj unheñ be-naqāb dekheñge

unheñ khulī huī āñkhoñ se ḳhvāb dekheñge

hijāb kaisā unheñ be-hijāb dekheñge

nigāh-e-shoḳh ko ham kāmyāb dekheñge

shabāb-e-husn ke charche haiñ tere aalam meñ

ham aaj husn tirā be-naqāb dekheñge

haram-o-dair ke parde meñ chhapne vāloñ ko

ḳhudā ne chāhā to ham be-naqāb dekheñge

ye parde kaise mohabbat meñ aur hayā kaisī

ham aaj jalve tire be-hijāb dekheñge

ham un kī bazm meñ pahlū meñ baiTh kar aaj

bahut qarīb se vo māhtāb dekheñge

balā se ka.abe ko jaate haiñ jaa.eñ shaiḳh 'farāz'

bas ham to rauza-e-ālī janāb dekheñge

ye zid hai aaj unhen be-naqab dekhenge

unhen khuli hui aankhon se KHwab dekhenge

hijab kaisa unhen be-hijab dekhenge

nigah-e-shoKH ko hum kaamyab dekhenge

shabab-e-husn ke charche hain tere aalam mein

hum aaj husn tera be-naqab dekhenge

haram-o-dair ke parde mein chhapne walon ko

KHuda ne chaha to hum be-naqab dekhenge

ye parde kaise mohabbat mein aur haya kaisi

hum aaj jalwe tere be-hijab dekhenge

hum un ki bazm mein pahlu mein baiTh kar aaj

bahut qarib se wo mahtab dekhenge

bala se kabe ko jate hain jaen shaiKH 'faraaz'

bas hum to rauza-e-ali janab dekhenge