یہ ضد ہے آج انہیں بے نقاب دیکھیں گے

یہ ضد ہے آج انہیں بے نقاب دیکھیں گے

انہیں کھلی ہوئی آنکھوں سے خواب دیکھیں گے

حجاب کیسا انہیں بے حجاب دیکھیں گے

نگاہ شوخ کو ہم کامیاب دیکھیں گے

شباب حسن کے چرچے ہیں تیرے عالم میں

ہم آج حسن ترا بے نقاب دیکھیں گے

حرم و دیر کے پردے میں چھپنے والوں کو

خدا نے چاہا تو ہم بے نقاب دیکھیں گے

یہ پردے کیسے محبت میں اور حیا کیسی

ہم آج جلوے ترے بے حجاب دیکھیں گے

ہم ان کی بزم میں پہلو میں بیٹھ کر آج

بہت قریب سے وہ ماہتاب دیکھیں گے

بلا سے کعبے کو جاتے ہیں جائیں شیخ فرازؔ

بس ہم تو روضۂ عالی جناب دیکھیں گے