jahan-e-ishq mein had se guzar gaya hun main

jahān-e-ishq meñ had se guzar gayā huuñ maiñ

qasam ḳhudā kī ḳhudā tujh meñ dekhtā huuñ maiñ

anokhā Dhañg hai nayā rañg merī ibādat kā

ki roz-o-shab tire jalvoñ meñ mubtalā huuñ maiñ

na ḳhauf-e-marg na shauq-e-hayāt hai mujh ko

jo mar miTā ho kisī par vo bā-ḳhudā huuñ maiñ

nishāñ batā.ūñ kis se apnī be-nishānī kā

tirī talāsh meñ muddat se lā-patā huuñ maiñ

nafas nafas meñ samāyā hai yuuñ tire jalve

ḳhud apnī shakl meñ ab tujh ko dekhtā huuñ maiñ

ham āshiqoñ kā hai mashrab judā zamāne meñ

huuñ banda yaar kā aur yaar pūjtā huuñ maiñ

tajalliyāñ mujhe ghere haiñ tere jalvoñ kī

terā jamāl hī din-rāt dekhtā huuñ maiñ

jahan-e-ishq mein had se guzar gaya hun main

qasam KHuda ki KHuda tujh mein dekhta hun main

anokha Dhang hai naya rang meri ibaadat ka

ki roz-o-shab tere jalwon mein mubtala hun main

na KHauf-e-marg na shauq-e-hayat hai mujh ko

jo mar miTa ho kisi par wo ba-KHuda hun main

nishan bataun kis se apni be-nishani ka

teri talash mein muddat se la-pata hun main

nafas nafas mein samaya hai yun tere jalwe

KHud apni shakl mein ab tujh ko dekhta hun main

hum aashiqon ka hai mashrab juda zamane mein

hun banda yar ka aur yar pujta hun main

tajalliyan mujhe ghere hain tere jalwon ki

tera jamal hi din-raat dekhta hun main