jis ghaDi yaadon mein teri yar kho jata hun main

jis ghaḌī yādoñ meñ terī yaar kho jaatā huuñ maiñ

phir to har jā par tujhī ko jalva-gar paatā huuñ maiñ

ab ye be-jā ho ki jā ho kufr ho parvā nahīñ

bandagī kā lutf qadmoñ meñ tire paatā huuñ maiñ

kāfir-o-vahshī koī dīvāna samjhe hai mujhe

laaj rakh shaidā kī apne terā kahlātā huuñ maiñ

dair ko puuje koī ka.abe pai sadqe ho koī

naqsh-e-pā tere sanam bas chūmtā jaatā huuñ meñ

haiñ saḳhī zādoñ ke dar yuuñ to jahāñ meñ aur bhī

par mirī jaañ tere aage haath phailātā huuñ maiñ

ai jahān-e-husn ke sultāñ karam ke bādshāh

ik nazar bas ik nazar vallāh tirā mañgtā huuñ maiñ

ḳhvāhish-e-jannat na gulzār iram chāhūñ 'farāz'

huuñ tirā banda tire dar par sukūñ paatā huuñ maiñ

jis ghaDi yaadon mein teri yar kho jata hun main

phir to har ja par tujhi ko jalwa-gar pata hun main

ab ye be-ja ho ki ja ho kufr ho parwa nahin

bandagi ka lutf qadmon mein tere pata hun main

kafir-o-wahshi koi diwana samjhe hai mujhe

laj rakh shaida ki apne tera kahlata hun main

dair ko puje koi kabe pai sadqe ho koi

naqsh-e-pa tere sanam bas chumta jata hun mein

hain saKHi zadon ke dar yun to jahan mein aur bhi

par meri jaan tere aage hath phailata hun main

ai jahan-e-husn ke sultan karam ke baadshah

ek nazar bas ek nazar wallah tera mangta hun main

KHwahish-e-jannat na gulzar iram chahun 'faraaz'

hun tera banda tere dar par sukun pata hun main