kabhi to zulfen haTa de ruKH se kabhi to tark-e-hijab kar de

kabhī to zulfeñ haTā de ruḳh se kabhī to tark-e-hijāb kar de

kabhī to husn-o-shabāb kī mai pilā ke īmāñ ḳharāb kar de

bhalā dīvāne se parda kaisā hijāb kaisā naqāb kaisā

maiñ tere sadqe meñ tujh pe qurbāñ shabāb ko be-naqāb kar de

ḳhud hī to jalve dikhā dikhā ke nazar ke nashtar chalā chalā ke

jo dil kī duniyā meñ kī hai halchal use hasīñ ek ḳhvāb kar de

thā ḳhauf-e-rusvā.ī kaash tujh ko to kyuuñ banāyā thā apnā mujh ko

yā apne qaul-o-qasam nibhāo yā mirā ḳhāna-ḳharāb karde

ye maanā sultān-e-husn hai tū gadā-e-husn-o-shabāb huuñ maiñ

bachā.e rab nazar-e-bad se tujh ko atā zakāt-e-shabāb karde

paḌā huuñ muddat se dar pai tere kabhī to jāgeñ nasīb mere

kabhī to nazreñ bachā ke sab se hasīn ruḳh be-naqāb karde

maiñ husn kā huuñ 'farāz' mai-kash shabāb ko pūjtā huuñ dil se

milā ke husn-o-shabāb donoñ atā nirālī sharāb karde

kabhi to zulfen haTa de ruKH se kabhi to tark-e-hijab kar de

kabhi to husn-o-shabab ki mai pila ke iman KHarab kar de

bhala diwane se parda kaisa hijab kaisa naqab kaisa

main tere sadqe mein tujh pe qurban shabab ko be-naqab kar de

ḳhud hi to jalwe dikha dikha ke nazar ke nashtar chala chala ke

jo dil ki duniya mein ki hai halchal use hasin ek KHwab kar de

tha KHauf-e-ruswai kash tujh ko to kyun banaya tha apna mujh ko

ya apne qaul-o-qasam nibhao ya mera KHana-KHarab karde

ye mana sultan-e-husn hai tu gada-e-husn-o-shabab hun main

bachae rab nazar-e-bad se tujh ko ata zakat-e-shabab karde

paDa hun muddat se dar pai tere kabhi to jagen nasib mere

kabhi to nazren bacha ke sab se hasin ruKH be-naqab karde

main husn ka hun 'faraaz' mai-kash shabab ko pujta hun dil se

mila ke husn-o-shabab donon ata nirali sharab karde