kabhi faiz-e-karam itna to mere yar ho jaye

kabhī faiz-e-karam itnā to mere yaar ho jaaye

jo ghabrā.e merā dil aap kā dīdār hojāye

huī muddat mirī jaañ ḳhāna-e-dil meñ tumhīñ rahte

kabhī jalva-garī dil kī hadoñ se paar ho jaa.e

are parda-nashīñ parde se bāhar bhī kabhī aao

jo honā hai vo dīvānoñ kā hāl-e-zār ho jaa.e

ye kaisī priit hai ulfat hai zālim pyaar hai kaisā

kahīñ shādābiyāñ jiinā kahīñ dushvār ho jaa.e

are o paikar-e-shān-e-karīmī husn kī mūrat

gadā.e husn par bhī ek nazar sarkār ho jaa.e

azal se huuñ maiñ shaidā.ī tumhārā tum merī chāhat

kahīñ rusvā merī ulfat na mere yaar ho jaaye

dil-e-nādāñ hī jab roz-e-azal se dam bhare us kā

'farāz' ab sochnā kyā jaañ bhī nazr-e-yār ho jaaye

kabhi faiz-e-karam itna to mere yar ho jaye

jo ghabrae mera dil aap ka didar hojaye

hui muddat meri jaan KHana-e-dil mein tumhin rahte

kabhi jalwa-gari dil ki hadon se par ho jae

are parda-nashin parde se bahar bhi kabhi aao

jo hona hai wo diwanon ka haal-e-zar ho jae

ye kaisi prit hai ulfat hai zalim pyar hai kaisa

kahin shadabiyan jina kahin dushwar ho jae

are o paikar-e-shan-e-karimi husn ki murat

gadae husn par bhi ek nazar sarkar ho jae

azal se hun main shaidai tumhaara tum meri chahat

kahin ruswa meri ulfat na mere yar ho jaye

dil-e-nadan hi jab roz-e-azal se dam bhare us ka

'faraaz' ab sochna kya jaan bhi nazr-e-yar ho jaye