kaun tha aankhen mila kar jo dil-o-jaan le chala

kaun thā āñkheñ milā kar jo dil-o-jāñ le chalā

kis but-e-kāfir kā ġhamza dīn-o-īmāñ le chalā

daulat-e-dil koī na koī gauhar-e-īmān-o-dīn

koī naqd-e-jāñ barā.e nazr-e-jānāñ le chalā

naqsh-e-sūrat se milā naqqāsh-e-mā'nī kā pata

sāne’-e-qudrat kī jānib husn-e-ḳhūbāñ le chalā

putla-e-kHākī meñ ye nairañgī-e-qudrat kahāñ

jān-e-'ālam 'ālam-e-jāñ ban ke insāñ le chalā

daar par khīñchūñgā josh-e-anal-haq bizzarūr

'ishq-e-dīvāna ko tere sū-e-zindāñ le chalā

pyaar se rahmat ne baḌh kar le liyā āġhosh meñ

dosh par rakh kar jo 'farhat' bār-e-'isyāñ le chalā

kaun tha aankhen mila kar jo dil-o-jaan le chala

kis but-e-kafir ka ghamza din-o-iman le chala

daulat-e-dil koi na koi gauhar-e-iman-o-din

koi naqd-e-jaan barae nazr-e-jaanan le chala

naqsh-e-surat se mila naqqash-e-ma'ni ka pata

sane’-e-qudrat ki jaanib husn-e-KHuban le chala

putla-e-kHaki mein ye nairangi-e-qudrat kahan

jaan-e-'alam 'alam-e-jaan ban ke insan le chala

dar par khinchunga josh-e-anal-haq bizzarur

'ishq-e-diwana ko tere su-e-zindan le chala

pyar se rahmat ne baDh kar le liya aaghosh mein

dosh par rakh kar jo 'farhat' bar-e-'isyan le chala