fasl-e-gul aai hai phir wahshat siwa hone ko hai

fasl-e-gul aa.ī hai phir vahshat sivā hone ko hai

purze-purze jism par mere qabā hone ko hai

ye kisī 'āshiq kā sar tan se judā hone ko hai

imtihān-e-teġh-e-qātil barmalā hone ko hai

dauḌe aate haiñ jo vo gor-e-ġharībāñ kī taraf

fitna ab taaza koī shāyad bapā hone ko hai

surḳh joḌā yaar ne pahnā hai ḳhanjar khīñch kar

aaj dekheñ mā'rka 'āshiq se kyā hone ko hai

hāsidoñ ne āḳhirash us shoḳh ko bhaḌkā diyā

sunte haiñ 'āshiq se ab vo phir ḳhafā hone ko hai

be-sabab jallād maqtal meñ nahīñ hote talab

'āshiqoñ ko 'ishq kī un ke sazā hone ko hai

log kahte haiñ ke guñdhvā.eñge choTī aap bhī

saañp samjhe the jise vo azhdahā hone ko hai

'āshiqoñ ke sar pe be-shak aane vaalī hai balā

zulf-e-mushkīñ dosh par un ke rihā hone ko hai

saḳht jaanī kyuuñ galā kaTne nahīñ detī merā

dukh gayā hai dast-e-qātil vo ḳhafā hone ko hai

be-tahāshā jab lipaT jaatā huuñ kahtā hai vo shoḳh

aaj dāman-gīr kyā terī qazā hone ko hai

thoḌī-thoḌī baat par har dam bigaḌte haiñ jo vo

ai surayyā tum pe phir zulm-o-sitam hone ko hai

fasl-e-gul aai hai phir wahshat siwa hone ko hai

purze-purze jism par mere qaba hone ko hai

ye kisi 'ashiq ka sar tan se juda hone ko hai

imtihan-e-tegh-e-qatil barmala hone ko hai

dauDe aate hain jo wo gor-e-ghariban ki taraf

fitna ab taza koi shayad bapa hone ko hai

surKH joDa yar ne pahna hai KHanjar khinch kar

aaj dekhen ma'rka 'ashiq se kya hone ko hai

hasidon ne aaKHirash us shoKH ko bhaDka diya

sunte hain 'ashiq se ab wo phir KHafa hone ko hai

be-sabab jallad maqtal mein nahin hote talab

'ashiqon ko 'ishq ki un ke saza hone ko hai

log kahte hain ke gundhwaenge choTi aap bhi

sanp samjhe the jise wo azhdaha hone ko hai

'ashiqon ke sar pe be-shak aane wali hai bala

zulf-e-mushkin dosh par un ke riha hone ko hai

saKHt jaani kyun gala kaTne nahin deti mera

dukh gaya hai dast-e-qatil wo KHafa hone ko hai

be-tahasha jab lipaT jata hun kahta hai wo shoKH

aaj daman-gir kya teri qaza hone ko hai

thoDi-thoDi baat par har dam bigaDte hain jo wo

ai surayya tum pe phir zulm-o-sitam hone ko hai