apne hawas mein shab-e-gham kab hayat hai

apne havās meñ shab-e-ġham kab hayāt hai

ai dard-e-hijr tū hī batā kitnī raat hai

har kā.ināt se alag kā.ināt hai

hairat-sarā-e-'ishq meñ din hai na raat hai

jiinā jo āgayā to ajal bhī hayāt hai

aur yuuñ to ’umr-e-kHizr bhī kyā be-sabāt hai

kyuuñ intihā-e-shauq ko kahte haiñ be-ḳhudī

ḳhurshīd hī kī āḳhirī manzil to raat hai

toḌā hai lā-makāñ kī hadoñ ko bhī 'ishq ne

zindān-e-'aql terī to kyā kā.ināt hai

gum ho ke har jagah maiñ ḳhud raftagān-e-'ishq

un kī bhī ahl-e-kashf-o-karāmāt zaat hai

hastī ba-juz fanā-e-musalsal ke kuchh nahīñ

phir kis liye ye fikr qarār-o-sabāt hai

apne hawas mein shab-e-gham kab hayat hai

ai dard-e-hijr tu hi bata kitni raat hai

har kainat se alag kainat hai

hairat-sara-e-'ishq mein din hai na raat hai

jina jo aagaya to ajal bhi hayat hai

aur yun to ’umr-e-kHizr bhi kya be-sabaat hai

kyun intiha-e-shauq ko kahte hain be-KHudi

KHurshid hi ki aaKHiri manzil to raat hai

toDa hai la-makan ki hadon ko bhi 'ishq ne

zindan-e-'aql teri to kya kainat hai

gum ho ke har jagah main KHud raftagan-e-'ishq

un ki bhi ahl-e-kashf-o-karamat zat hai

hasti ba-juz fana-e-musalsal ke kuchh nahin

phir kis liye ye fikr qarar-o-sabaat hai