gae donon-jahan nazar se guzar teri shan ka koi bashar na mila

ga.e donoñ-jahāñ nazar se guzar tirī shaan kā koī bashar na milā

tirī har jagah dekhī nirālī phaban tirā bhed kisī ko magar na milā

tirā charchā jahāñ kī zabānoñ meñ hai tirā shor zamāne ke kānoñ meñ hai

magar āñkhoñ se dekhā to parda-nashīñ kahīñ tū na milā tirā ghar na milā

koī jalva-e-tūr pe ġhash meñ girā koī sidrah pe chalne se aarī huā

ga.ī aql-e-rasā to ḳhabar na milī uḌā tā.ir-e-fikr to par na milā

mire milne se hotā hai chīñ-ba-jabīñ tire milne na milne kā shikva nahīñ

jo gilā hai to hai yahī haq se gilā mujhe tirā sā haa.e jigar na milā

koī milne kā tere nishāñ bhī hai kahīñ rahne kā tere makāñ bhī hai

tujhe dekhā idhar to udhar na milā tujhe DhūñDā idhar to udhar na milā

kahīñ dast-e-savāl darāz nahīñ kisī aur pe yuuñ mujhe naaz nahīñ

koī tujh sā ġharīb-navāz nahīñ tire dar ke sivā koī dar na milā

maiñ ḳhudā jaane kis pe huā huuñ fidā mire hosh-o-havās nahīñ haiñ bajā

pare haT tū parī mere paas na aa chal huur tū mujh se nazar na milā

maiñ hamesha asīr-e-alam hī rahā mire dil meñ sadā terā ġham hī rahā

mirā naḳhl-e-ummīd qalam hī rahā mere rone kā koī samar na milā

isī fikr meñ guzre hai din 'akbar' isī ġham meñ gine taare shab-bhar

kiyā jis ne ishāre se TukḌe qamar kabhī ham se vo rashk-e-qamar na milā

gae donon-jahan nazar se guzar teri shan ka koi bashar na mila

teri har jagah dekhi nirali phaban tera bhed kisi ko magar na mila

tera charcha jahan ki zabanon mein hai tera shor zamane ke kanon mein hai

magar aankhon se dekha to parda-nashin kahin tu na mila tera ghar na mila

koi jalwa-e-tur pe ghash mein gira koi sidrah pe chalne se aari hua

gai aql-e-rasa to KHabar na mili uDa tair-e-fikr to par na mila

mere milne se hota hai chin-ba-jabin tere milne na milne ka shikwa nahin

jo gila hai to hai yahi haq se gila mujhe tera sa hae jigar na mila

koi milne ka tere nishan bhi hai kahin rahne ka tere makan bhi hai

tujhe dekha idhar to udhar na mila tujhe DhunDa idhar to udhar na mila

kahin dast-e-sawal daraaz nahin kisi aur pe yun mujhe naz nahin

koi tujh sa gharib-nawaz nahin tere dar ke siwa koi dar na mila

main KHuda jaane kis pe hua hun fida mere hosh-o-hawas nahin hain baja

pare haT tu pari mere pas na aa chal hur tu mujh se nazar na mila

main hamesha asir-e-alam hi raha mere dil mein sada tera gham hi raha

mera naKHl-e-ummid qalam hi raha mere rone ka koi samar na mila

isi fikr mein guzre hai din 'akbar' isi gham mein gine tare shab-bhar

kiya jis ne ishaare se TukDe qamar kabhi hum se wo rashk-e-qamar na mila