gham-e-ishq mein aah-o-fariyaad kaisi har ek naz unka uThana paDega

ġham-e-ishq meñ āh-o-fariyād kaisī har ik naaz unkā uThānā paḌegā

jabīñ par shikan bhī hai kufr-e-mohabbat musībat meñ bhī muskurānā paḌegā

ḳhudā-hāfiz ab dil kī ḳhuddāriyoñ kā vo aate nahīñ unko laanā paḌegā

mohabbat se majbūr huuñ kyā batā.ūñ unheñ kaise kaise manānā paḌegā

qasam hai tumheñ merī uftādgī kī qasam hai mohabbat kī be-chārgī kī

kahāñ dil ko vīrāñ banā jā rahe ho tumhīñ ko use phir basānā paḌegā

agar husn kā kuchh mohabbat pe haq hai mohabbat kā bhī to kuchh husn par hai

kabhī nāz-bardār kā naaz bhī to huzūr aap ko kuchh uThānā paḌegā

huā ishq se ye hameñ istifāda maze meñ vahī hai jo hai be-irāda

inhīñ kī ḳhushī meñ mazedāriyāñ haiñ nahīñ to beḌā dukh uThānā paḌegā

kabhī varta-e-ġham meñ dil ko Dubo kar kabhī ḳhuun pī kar kabhī ḳhuun ro kar

bahut kuchh abhī apnī rūdād-e-ġham ko isī tarah rañgīñ banānā paḌegā

nashīlī nigāhoñ ke maare huoñ ko bas ik be-ḳhudī meñ guzāre huoñ ko

terī mast-āñkhoñ ke qurbān saaqī unheñ sāġharoñ se pilānā paḌegā

ināyat se tum dekh lete ho lekin kisī kī nazar lag nā jaaye kisī din

ḳhudā jaane kis kis kī nazroñ se kab tak tumhārī nazar ko bachānā paḌegā

qiyāmat hai ye ishq kī sādgī bhī mukammal hai 'kāmil' kī dīvāngī bhī

sukūn-e-dil-o-jāñ vahāñ DhūñDhtā hai jahāñ jaan par khel jaana paḌegā

gham-e-ishq mein aah-o-fariyaad kaisi har ek naz unka uThana paDega

jabin par shikan bhi hai kufr-e-mohabbat musibat mein bhi muskurana paDega

KHuda-hafiz ab dil ki KHuddariyon ka wo aate nahin unko lana paDega

mohabbat se majbur hun kya bataun unhen kaise kaise manana paDega

qasam hai tumhein meri uftadgi ki qasam hai mohabbat ki be-chaargi ki

kahan dil ko viran bana ja rahe ho tumhin ko use phir basana paDega

agar husn ka kuchh mohabbat pe haq hai mohabbat ka bhi to kuchh husn par hai

kabhi naz-bardar ka naz bhi to huzur aap ko kuchh uThana paDega

hua ishq se ye hamein istifada maze mein wahi hai jo hai be-irada

inhin ki KHushi mein mazedariyan hain nahin to beDa dukh uThana paDega

kabhi warta-e-gham mein dil ko Dubo kar kabhi KHun pi kar kabhi KHun ro kar

bahut kuchh abhi apni rudad-e-gham ko isi tarah rangin banana paDega

nashili nigahon ke mare huon ko bas ek be-KHudi mein guzare huon ko

teri mast-ankhon ke qurban saqi unhen sagharon se pilana paDega

inayat se tum dekh lete ho lekin kisi ki nazar lag na jaye kisi din

KHuda jaane kis kis ki nazron se kab tak tumhaari nazar ko bachana paDega

qiyamat hai ye ishq ki sadgi bhi mukammal hai 'kaamil' ki diwangi bhi

sukun-e-dil-o-jaan wahan DhunDhta hai jahan jaan par khel jaana paDega