gardishon ke hain mare hue na dushmanon ke satae hue hain

gardishoñ ke haiñ maare hue na dushmanoñ ke satā.e hue haiñ

jitne bhī zaḳhm haiñ mere dil par dostoñ ke lagā.e hue haiñ

jab se dekhā tirā qadd-o-qāmat dil pe TuuTī huī hai qayāmat

har balā se rahe tū salāmat din javānī ke aa.e hue haiñ

aur de mujh ko de aur saaqī hosh rahtā hai thoḌā sā baaqī

aaj talḳhī bhī hai intihā kī aaj vo bhī parā.e hue haiñ

kal the ābād pahlū meñ mere ab haiñ ġhairoñ kī mahfil meñ Dere

merī mahfil meñ kar ke añdhere apnī mahfil sajā.e hue haiñ

apne hāthoñ se ḳhanjar chalā kar kitnā mā’sūm chehra banā kar

apne kāñdhoñ pe ab mere qātil merī mayyat uThā.e hue haiñ

mah-vashoñ ko vafā se kyā matlab in butoñ ko ḳhudā se kyā matlab

un kī mā'sūm nazroñ ne 'nāsir' log pāgal banā.e hue haiñ

gardishon ke hain mare hue na dushmanon ke satae hue hain

jitne bhi zaKHm hain mere dil par doston ke lagae hue hain

jab se dekha tera qadd-o-qamat dil pe TuTi hui hai qayamat

har bala se rahe tu salamat din jawani ke aae hue hain

aur de mujh ko de aur saqi hosh rahta hai thoDa sa baqi

aaj talKHi bhi hai intiha ki aaj wo bhi parae hue hain

kal the aabaad pahlu mein mere ab hain ghairon ki mahfil mein Dere

meri mahfil mein kar ke andhere apni mahfil sajae hue hain

apne hathon se KHanjar chala kar kitna ma’sum chehra bana kar

apne kandhon pe ab mere qatil meri mayyat uThae hue hain

mah-washon ko wafa se kya matlab in buton ko KHuda se kya matlab

un ki ma'sum nazron ne 'nasir' log pagal banae hue hain