garm andar ka ukhaDa hai to mai-KHane se

garm andar kā ukhāḌā hai to mai-ḳhāne se

raqs pariyoñ kā koī siikh le paimāne se

'aks kī jhepī huī shakl to ā.īne meñ dekh

sharm us ko bhī to aa.ī tire sharmāne se

dil hai dīvāna-e-gesū to pahan le beḌī

aan hai 'ishq ke bāñkoñ kī usī baane se

raat ye taaza khilā gul ki mire dil kī kalī

muskurā.ī tirī cholī ke masak jaane se

aabrū hai dil-e-dīvāna hī se gesū kī

mutabarrik hai ye tasbīh usī daane se

un kī ye haT ki nahīñ aaj na dūñgā bosa

dil kī ye zid ki bahaltā nahīñ bahlāne se

dhoke dete nahīñ āñkhoñ ko bayābānoñ meñ

chaleñ karte haiñ chhalāve tire dīvāne se

e'tibār aap ne vā'de kā ḳhud apne khoyā

na rahī itnī bhī tauqīr qasam khāne se

kahtī hai vasl kī shab un kī hayā sī shoḳhī

aaj hāsil nahīñ kuchh chhupne sharmāne se

ḳhānqāhoñ meñ jo ye phirtī hai bahkī-bahkī

tauba bhī pī ke magar niklī hai mai-ḳhāne se

dekh paayā hai unheñ hazrat-e-nāseh ne kahīñ

ab maiñ samjhā jo ġharaz hai mirī samjhāne se

qāzī-e-shahr ho yā shaiḳh-e-haram koī ho

jo na ho mast nikālo use mai-ḳhāne se

ashk hai daana mirā ashk hai paanī merā

aur vāqif huuñ na paanī se na maiñ daane se

ik zarā sī harakat kī bhī sakat mujh meñ nahīñ

ġhash pe ġhash aate haiñ ab hosh meñ bhī aane se

tauba TuuTī hai zarūr aaj kisī ūñche kī

tauba-tauba kī sadā aatī hai mai-ḳhāne se

loTeñ 'ushshāq-e-tah-e-ḳhāk ke sīnoñ pe bhī saañp

ye ishāra hai laTeñ zulf kī laTkāne se

garm andar ka ukhaDa hai to mai-KHane se

raqs pariyon ka koi sikh le paimane se

'aks ki jhepi hui shakl to aaine mein dekh

sharm us ko bhi to aai tere sharmane se

dil hai diwana-e-gesu to pahan le beDi

aan hai 'ishq ke bankon ki usi bane se

raat ye taza khila gul ki mere dil ki kali

muskurai teri choli ke masak jaane se

aabru hai dil-e-diwana hi se gesu ki

mutabarrik hai ye tasbih usi dane se

un ki ye haT ki nahin aaj na dunga bosa

dil ki ye zid ki bahalta nahin bahlane se

dhoke dete nahin aankhon ko bayabanon mein

chalen karte hain chhalawe tere diwane se

e'tibar aap ne wa'de ka KHud apne khoya

na rahi itni bhi tauqir qasam khane se

kahti hai wasl ki shab un ki haya si shoKHi

aaj hasil nahin kuchh chhupne sharmane se

KHanqahon mein jo ye phirti hai bahki-bahki

tauba bhi pi ke magar nikli hai mai-KHane se

dekh paya hai unhen hazrat-e-naseh ne kahin

ab main samjha jo gharaz hai meri samjhane se

qazi-e-shahr ho ya shaiKH-e-haram koi ho

jo na ho mast nikalo use mai-KHane se

ashk hai dana mera ashk hai pani mera

aur waqif hun na pani se na main dane se

ek zara si harakat ki bhi sakat mujh mein nahin

ghash pe ghash aate hain ab hosh mein bhi aane se

tauba TuTi hai zarur aaj kisi unche ki

tauba-tauba ki sada aati hai mai-KHane se

loTen 'ushshaq-e-tah-e-KHak ke sinon pe bhi sanp

ye ishaara hai laTen zulf ki laTkane se