ye makan se ta-sar-e-la-makan usi ek wajud ka KHwab hai

ye makāñ se tā-sar-e-lā-makāñ usī ik vajūd kā ḳhvāb hai

ye zuhūr donoñ jahān kā ruḳh yaar hī kī naqāb hai

kahūñ kaisā bahr-e-vajūd hai do-jahāñ kī jis meñ ki buud hai

koī qatra hai koī naqsh hai koī mauj koī habāb hai

hai ajab chaman kā ye rañg Dhañg ki aab kā to hai ek rañg

ye hazāroñ qism ke phuul haiñ kahīñ sumbul aur gulāb hai

ye baqā mirī ye fanā mirī tirī zaat se hai ai dil-rubā

tirī zaat se huuñ maiñ zāhiran mirī hastī naqsh bar-āb hai

mirā ain to tirā ain meñ na to ġhair hai na maiñ aur huuñ

mire yaar parda na mujh se kar mujhe kuchh na tujh se hijāb hai

vahīñ be-ḳhudī meñ bhale the ham ki na apnī hastī kā hosh thā

nikal aa.e yaañ to huā ġhazab ki ḳhudī meñ hāl-e-ḳharāb hai

kaaro tum tilāvat-e-zāt bas yahī kaam 'ġhausī' rakho sadā

ye qur.āñ hai haq ke vajūd kā ye ḳhudā kī ḳhaas kitāb hai

ye makan se ta-sar-e-la-makan usi ek wajud ka KHwab hai

ye zuhur donon jahan ka ruKH yar hi ki naqab hai

kahun kaisa bahr-e-wajud hai do-jahan ki jis mein ki bud hai

koi qatra hai koi naqsh hai koi mauj koi habab hai

hai ajab chaman ka ye rang Dhang ki aab ka to hai ek rang

ye hazaron qism ke phul hain kahin sumbul aur gulab hai

ye baqa meri ye fana meri teri zat se hai ai dil-ruba

teri zat se hun main zahiran meri hasti naqsh bar-ab hai

mera ain to tera ain mein na to ghair hai na main aur hun

mere yar parda na mujh se kar mujhe kuchh na tujh se hijab hai

wahin be-KHudi mein bhale the hum ki na apni hasti ka hosh tha

nikal aae yan to hua ghazab ki KHudi mein haal-e-KHarab hai

karo tum tilawat-e-zat bas yahi kaam 'ghausi' rakho sada

ye quran hai haq ke wajud ka ye KHuda ki KHas kitab hai