allah re kya aap ka hai husn bala ka

allāh re kyā aap kā hai husn balā kā

hogā na do-a.alam meñ to us ān-o-adā kā

dekhe jo dam-e-zabh adā.eñ tirī qātil

hojāye qazā ko mirī armān qazā kā

jo tiir hai dil-doz hai jo baat hai dilchasp

aatā hai maza terī jafā meñ bhī adā kā

hairān-e-kHudā.ī hai tujhe dekh ke pyāre

lete haiñ jigar thaam ke sab naam ḳhudā kā

ek ek adā se miTe lākhoñ hī vafā meñ

kyā siikh liyā aap ne bhī Dhañg jafā kā

ḳhud jaane kī tāqat nahīñ vo ā.eñge aap hī

ehsān na lūñgā maiñ kabhī bād-e-sabā kā

the duur to be-parda the paas aa.e to mahjūb

ye siikh liyā tum ne chalan kis se hayā kā

go lākhoñ hī pardoñ meñ dil apnā ye chhupāyā

lekin tirī nazroñ ne use duur se taakā

barbād hue ham tirī sah sah ke jafā.eñ

bhūle se bhī tuune na liyā naam vafā kā

'ġhausī' maiñ usī dar kā ik ḳhāk-nashīñ huuñ

rutba hai jahāñ ek sabhī shāh-o-gadā kā

allah re kya aap ka hai husn bala ka

hoga na do-alam mein to us aan-o-ada ka

dekhe jo dam-e-zabh adaen teri qatil

hojaye qaza ko meri arman qaza ka

jo tir hai dil-doz hai jo baat hai dilchasp

aata hai maza teri jafa mein bhi ada ka

hairan-e-kHudai hai tujhe dekh ke pyare

lete hain jigar tham ke sab nam KHuda ka

ek ek ada se miTe lakhon hi wafa mein

kya sikh liya aap ne bhi Dhang jafa ka

KHud jaane ki taqat nahin wo aaenge aap hi

ehsan na lunga main kabhi baad-e-saba ka

the dur to be-parda the pas aae to mahjub

ye sikh liya tum ne chalan kis se haya ka

go lakhon hi pardon mein dil apna ye chhupaya

lekin teri nazron ne use dur se taka

barbaad hue hum teri sah sah ke jafaen

bhule se bhi tune na liya nam wafa ka

'ghausi' main usi dar ka ek KHak-nashin hun

rutba hai jahan ek sabhi shah-o-gada ka