Khaali to na hota kabhi mai-KHana kisi ka

ḳhālī to na hotā kabhī mai-ḳhāna kisī kā

phir kyā thā jo bhar detā vo paimāna kisī kā

abrū kā na ḳhanjar kā adā kā na kisī kā

maarā huā hai ye dil dīvāna kisī kā

tum duur se ro doge baḌā dard bharā hai

dekho na suno chheḌ ke afsāna kisī kā

hāthoñ meñ subū lab pe fuġhāñ paañv meñ laġhzish

kyā shorish-e-mastī meñ hai mastāna kisī kā

jalve pe tire karte haiñ sajda tujhe but bhī

ab ka.aba huā TuuT ke but-ḳhāna kisī kā

dil TukḌe jigar chaak hai aur jaan pe sadma

kyā kyā na sitam Dhātā hai yārāna kisī kā

ruktā bhī hai sadqe bhī hai hasrat se hai taktā

kis dhuum se jaltā hai ye parvāna kisī kā

uḌtī huī kah un se sabā hālat-e-'ġhausī'

''ġham se kahīñ be-kal na ho jānāna kisī kā

KHali to na hota kabhi mai-KHana kisi ka

phir kya tha jo bhar deta wo paimana kisi ka

abru ka na KHanjar ka ada ka na kisi ka

mara hua hai ye dil diwana kisi ka

tum dur se ro doge baDa dard bhara hai

dekho na suno chheD ke afsana kisi ka

hathon mein subu lab pe fughan panw mein laghzish

kya shorish-e-masti mein hai mastana kisi ka

jalwe pe tere karte hain sajda tujhe but bhi

ab kaba hua TuT ke but-KHana kisi ka

dil TukDe jigar chaak hai aur jaan pe sadma

kya kya na sitam Dhata hai yarana kisi ka

rukta bhi hai sadqe bhi hai hasrat se hai takta

kis dhum se jalta hai ye parwana kisi ka

uDti hui kah un se saba haalat-e-'ghausi'

gham se kahin be-kal na ho jaanana kisi ka