mar raha hun main KHayal-e-yar mein

mar rahā huuñ maiñ ḳhayāl-e-yār meñ

hasrateñ haiñ sau dil-e-bīmār meñ

sādgī par un kī martā hai jahāñ

Dher hai lāshoñ ke sab bāzār meñ

kar diyā chhalnī kaleje ko tamām

barchhiyāñ haiñ kyā nigāh-e-yār meñ

mere nāloñ ne jalāyā sab chaman

ḳhaar tak baaqī nahīñ gulzār meñ

uḌ ke sar qātil ke qadmoñ par girā

phal lagā hasrat kā naḳhl-e-vār meñ

zindagī hai us meñ is meñ maut hai

farq hai iqbāl meñ inkār meñ

ek dam meñ saiñkaḌoñ ghā.il hue

kitnī chhuriyāñ haiñ nigāh-e-yār meñ

gor par hasrat barastī hai mirī

mar gayā huuñ hasrat-e-dīdār meñ

un kā ghar ā.īnā-kHāna ho gayā

lag ga.e dil sab dar-o-dīvār meñ

khud rahī hai qabr talvāroñ se aaj

dafn 'ġhausī' kā hai kū-e-yār meñ

mar raha hun main KHayal-e-yar mein

hasraten hain sau dil-e-bimar mein

sadgi par un ki marta hai jahan

Dher hai lashon ke sab bazar mein

kar diya chhalni kaleje ko tamam

barchhiyan hain kya nigah-e-yar mein

mere nalon ne jalaya sab chaman

KHar tak baqi nahin gulzar mein

uD ke sar qatil ke qadmon par gira

phal laga hasrat ka naKHl-e-war mein

zindagi hai us mein is mein maut hai

farq hai iqbaal mein inkar mein

ek dam mein sainkaDon ghail hue

kitni chhuriyan hain nigah-e-yar mein

gor par hasrat barasti hai meri

mar gaya hun hasrat-e-didar mein

un ka ghar aaina-kHana ho gaya

lag gae dil sab dar-o-diwar mein

khud rahi hai qabr talwaron se aaj

dafn 'ghausi' ka hai ku-e-yar mein