kya kahun KHud ko main apne mein kya kya ho gaya

kyā kahūñ ḳhud ko maiñ apne meñ kyā kyā ho gayā

ḳhud-tamāshā.ī banā ḳhud hī tamāshā ho gayā

ḳhud meñ ḳhud ko dekhtā huuñ ḳhud kā ḳhud huuñ ā.īna

aap hī banda-numā aur aap maulā ho gayā

sab mirī shāneñ haiñ mere ruup mere taur haiñ

har ta.ayyun meñ nirālā rañg merā ho gayā

vo hayūlā huuñ ki mujh se hai jahāñ ke sab numūd

jo na thā kuchh bhī vo sab mujh se huvaidā ho gayā

sab ḳhayālī sūrateñ haiñ ek huuñ maiñ ek huuñ

merī ġhairiyat kā har sūrat ko dhokā ho gayā

bāvajūd is ke ki maiñ hī sab meñ zāhir huuñ magar

merī ye be-pardagī ḳhud ek parda ho gayā

ḳhud ko har har ā.īna meñ dekhtā huuñ maiñ alag

ḳhud hī phir kasrat meñ vahdat kā muamma ho gayā

shakl-e-nā-mahram kahīñ rahtā huuñ maiñ jalva-fazā

sūrat-e-‘ġhausī’ kahīñ irfān vaalā ho gayā

kya kahun KHud ko main apne mein kya kya ho gaya

KHud-tamashai bana KHud hi tamasha ho gaya

KHud mein KHud ko dekhta hun KHud ka KHud hun aaina

aap hi banda-numa aur aap maula ho gaya

sab meri shanen hain mere rup mere taur hain

har tayyun mein nirala rang mera ho gaya

wo hayula hun ki mujh se hai jahan ke sab numud

jo na tha kuchh bhi wo sab mujh se huwaida ho gaya

sab KHayali suraten hain ek hun main ek hun

meri ghairiyat ka har surat ko dhoka ho gaya

bawajud is ke ki main hi sab mein zahir hun magar

meri ye be-pardagi KHud ek parda ho gaya

KHud ko har har aaina mein dekhta hun main alag

KHud hi phir kasrat mein wahdat ka muamma ho gaya

shakl-e-na-mahram kahin rahta hun main jalwa-faza

surat-e-‘ghausi’ kahin irfan wala ho gaya