koi mast mujhko bana gaya wo piyala mujhko pila gaya

koī mast mujh ko banā gayā vo piyāla mujh ko pilā gayā

diyā kaan meñ mere phūñk kuchh mujhe jaane kyā vo banā gayā

vo fusūñ thā us kī nigāh meñ ki fusūñ bhī jis ko na kah sakīñ

mujhe ḳhud nazar vo banā gayā vo nazar milā ke chalā gayā

vo sharāb us kī sharāb thī ki halāl bhī thī vo paak bhī

vo thā nashsha us kā bhī nashsha kuchh ki maiñ ḳhud ko khoyā bhī pā gayā

diyā maiñ ne jaan bhī tan use diyā maiñ ne diin bhī dil use

liyā le ke phir kiyā mustarad unheñ aur kuchh vo banā gayā

koī dekhnā use dekhnā ki nazar meñ us kī hai kīmiyā

ki maiñ pahle kī tarah ab nahīñ mujhe jaane kyā vo banā gayā

ajab us kī bātoñ meñ baat thī ki chhupī huī koī zaat thī

ki patte the saare khule hue vo batā ke sab ko patā gayā

koī ik ko sab hī samajhtā thā koī sab ko sab use chhoḌ kar

vahī vo hai sab meñ ye sab nahīñ vo sabhoñ meñ aisā batā gayā

jise DhūñDhtā thā maiñ jā-ba-jā vo nazar bachā ke thā har jagah

vo nazar-navāz har ik jagah mujhe us kā jalva dikhā gayā

vo balā kī us kī thī sādgī ki nazar jahāñ na jachtī thī

magar us pe bhī vo karīm thā ki batā ke sab ko patā gayā

kyā jām-e-hastī se mast jab to lagā vo 'ġhausī' ko chhoḌne

baḌī minnatoñ se pata liyā to kamāl naam batā gayā

koi mast mujh ko bana gaya wo piyala mujh ko pila gaya

diya kan mein mere phunk kuchh mujhe jaane kya wo bana gaya

wo fusun tha us ki nigah mein ki fusun bhi jis ko na kah sakin

mujhe KHud nazar wo bana gaya wo nazar mila ke chala gaya

wo sharab us ki sharab thi ki halal bhi thi wo pak bhi

wo tha nashsha us ka bhi nashsha kuchh ki main KHud ko khoya bhi pa gaya

diya main ne jaan bhi tan use diya main ne din bhi dil use

liya le ke phir kiya mustarad unhen aur kuchh wo bana gaya

koi dekhna use dekhna ki nazar mein us ki hai kimiya

ki main pahle ki tarah ab nahin mujhe jaane kya wo bana gaya

ajab us ki baaton mein baat thi ki chhupi hui koi zat thi

ki patte the sare khule hue wo bata ke sab ko pata gaya

koi ek ko sab hi samajhta tha koi sab ko sab use chhoD kar

wahi wo hai sab mein ye sab nahin wo sabhon mein aisa bata gaya

jise DhunDhta tha main ja-ba-ja wo nazar bacha ke tha har jagah

wo nazar-nawaz har ek jagah mujhe us ka jalwa dikha gaya

wo bala ki us ki thi sadgi ki nazar jahan na jachti thi

magar us pe bhi wo karim tha ki bata ke sab ko pata gaya

kya jam-e-hasti se mast jab to laga wo 'ghausi' ko chhoDne

baDi minnaton se pata liya to kamal nam bata gaya