kisi ke husn ka jalwa hun wo hijab hun main

kisī ke husn kā jalva huuñ vo hijāb huuñ maiñ

jamāl-e-yār kī halkī sī ik naqāb huuñ maiñ

kisī kā jalva hai zāhir to us kā huuñ maz.har

kisī kī hastī hai paanī to ik sarāb huuñ maiñ

kisī kā bāñdhā huā ik naqsh hastī huuñ

haiñ hai bahr to us bahr kā habāb huuñ maiñ

tumhārā husn rahe aur tum raho ābād

duā.eñ miT ke bhī detā huuñ vo ḳharāb huuñ maiñ

vo be-nazīr hasīñ aur maiñ us kā ā.īna

vo apne husn meñ be-misl lā-javāb huuñ maiñ

na pūchho kyā huuñ maiñ kaisā vujūd hai merā

jo dekhte haiñ vo bedār meñ vo ḳhvāb huuñ maiñ

nihāñ haiñ mujh meñ nukush-e-jahān-e-ġhaib-o-shuhūd

tamām husn kā daftar huuñ vo kitāb huuñ maiñ

maiñ kuchh na ho ke bhī un kī nazar meñ rahtā huuñ

karam un kā ki lākhoñ meñ intiḳhāb huuñ maiñ

maiñ kyā batā.ūñ ki hai mujh meñ kyā nihāñ 'ġhausī'

agarche sūrat-e-zarra huuñ āftāb huuñ maiñ

kisi ke husn ka jalwa hun wo hijab hun main

jamal-e-yar ki halki si ek naqab hun main

kisi ka jalwa hai zahir to us ka hun mazhar

kisi ki hasti hai pani to ek sarab hun main

kisi ka bandha hua ek naqsh hasti hun

hain hai bahr to us bahr ka habab hun main

tumhaara husn rahe aur tum raho aabaad

duaen miT ke bhi deta hun wo KHarab hun main

wo be-nazir hasin aur main us ka aaina

wo apne husn mein be-misl la-jawab hun main

na puchho kya hun main kaisa wujud hai mera

jo dekhte hain wo bedar mein wo KHwab hun main

nihan hain mujh mein nukush-e-jahan-e-ghaib-o-shuhud

tamam husn ka daftar hun wo kitab hun main

main kuchh na ho ke bhi un ki nazar mein rahta hun

karam un ka ki lakhon mein intiKHab hun main

main kya bataun ki hai mujh mein kya nihan 'ghausi'

agarche surat-e-zarra hun aaftab hun main