ayan husn-e-ruKH-e-dildar dekho

ayaañ husn-e-ruḳh-e-dildār dekho

har ik shai meñ jamāl-e-yār dekho

ḳhudī kyā chiiz hai ḳhud chiiz kyā ho

use samjho use har baar dekho

maiñ hī banda huuñ kahtā hai maiñ hī haq

anā ke haiñ ye kyā iqrār dekho

ḳhudī ko chhoḌ kar aao ḳhudī meñ

ḳhudī meñ kaun hai ḳhuddār dekho

jahāñ ko ā.īnā-kHāna banāo

phir us meñ jalva-e-dil-dār dekho

baġhair yaar haiñ aġhyār kis jā

unhīñ aġhyār meñ hai yaar dekho

khulī dūkāñ hai asrār ḳhudī kī

ye shai hai ab sar-e-bāzār dekho

tum hī meñ hai jise tum DhūñDte ho

zarā ḳhud ko to tum ik baar dekho

tumhīñ sā hai agar 'ġhausī' to kyā hai

tum us meñ kis ke haiñ anvār dekho

ayan husn-e-ruKH-e-dildar dekho

har ek shai mein jamal-e-yar dekho

KHudi kya chiz hai KHud chiz kya ho

use samjho use har bar dekho

main hi banda hun kahta hai main hi haq

ana ke hain ye kya iqrar dekho

KHudi ko chhoD kar aao KHudi mein

KHudi mein kaun hai KHuddar dekho

jahan ko aaina-kHana banao

phir us mein jalwa-e-dil-dar dekho

baghair yar hain aghyar kis ja

unhin aghyar mein hai yar dekho

khuli dukan hai asrar KHudi ki

ye shai hai ab sar-e-bazar dekho

tum hi mein hai jise tum DhunDte ho

zara KHud ko to tum ek bar dekho

tumhin sa hai agar 'ghausi' to kya hai

tum us mein kis ke hain anwar dekho