tujhe dekhta hun jahan jahan nazar aa raha hai wahan tu hi

tujhe dekhtā huuñ jahāñ jahāñ nazar aa rahā hai vahāñ tū hī

go barī hai rañg-e-jahāñ se tū mirī jaañ magar hai jahāñ tū hī

tū nahīñ to phir ye jahāñ kahāñ tire dam se hai ye jahāñ jahāñ

go jahāñ hai aur tū aur hai hai magar jahān kī jaañ tū hī

tirā bhed mujh pe ye khul gayā tirā jalva mujh se na chhup sakā

mire jism se hai ayaañ tū hī mirī jaan meñ hai nihāñ tū hī

tū hī nuur hai tū hī nuur hai tire nuur kā ye zuhūr hai

tire lā-makāñ kā hai ye nishāñ ki makīñ tū hī hai makāñ tū hī

mujhe thā gumāñ mirā tan hai ye mirā dil hai ye mirī jaañ hai ye

ye yaqīñ hai ab mirā tan tū hī mirā dil tū hī mirī jaañ tū hī

tujhe jāntā huuñ tujh hī se maiñ tujhe dekhtā huuñ tujhī se maiñ

hai ba-jān-e-'ġhausī' nihāñ tū hī ba-shakl-e-'ġhausī' ayaañ tū hī

tujhe dekhta hun jahan jahan nazar aa raha hai wahan tu hi

go bari hai rang-e-jahan se tu meri jaan magar hai jahan tu hi

tu nahin to phir ye jahan kahan tere dam se hai ye jahan jahan

go jahan hai aur tu aur hai hai magar jahan ki jaan tu hi

tera bhed mujh pe ye khul gaya tera jalwa mujh se na chhup saka

mere jism se hai ayan tu hi meri jaan mein hai nihan tu hi

tu hi nur hai tu hi nur hai tere nur ka ye zuhur hai

tere la-makan ka hai ye nishan ki makin tu hi hai makan tu hi

mujhe tha guman mera tan hai ye mera dil hai ye meri jaan hai ye

ye yaqin hai ab mera tan tu hi mera dil tu hi meri jaan tu hi

tujhe jaanta hun tujh hi se main tujhe dekhta hun tujhi se main

hai ba-jaan-e-'ghausi' nihan tu hi ba-shakl-e-'ghausi' ayan tu hi