ek dam koi gar dekhe wo jalwa-e-jaanana

ik dam koī gar dekhe vo jalva-e-jānāna

mujh sā bane dīvāna mujh sā rahe mastāna

hālat pe mirī zāhid nādān tū hañstā hai

kuchh tujh pe agar guzre ban jā.egā dīvāna

mastī kā mire 'ālam vo hai ki maiñ hī maiñ huuñ

yaañ ḳhvesh-parastī hai apnā hai na begāna

mai hai ye ḳhudī merī mastī mujhe ḳhud se hai

maiñ aap hī saaqī huuñ aur aap hī mai-ḳhāna

gulzār meñ maiñ gul huuñ gul meñ huuñ maiñ bū ho kar

tuutī kā maiñ naġhma huuñ bulbul kā huuñ afsāna

har dam na.e jalve haiñ dam se mire 'ālam meñ

har aan na.ī merī har taur judā-gāna

shāhān-e-jahāñ meñ maiñ sau shaan se huuñ 'ġhausī'

rakhtā huuñ faqīroñ meñ sau rañg faqīrāna

ek dam koi gar dekhe wo jalwa-e-jaanana

mujh sa bane diwana mujh sa rahe mastana

haalat pe meri zahid nadan tu hansta hai

kuchh tujh pe agar guzre ban jaega diwana

masti ka mere 'alam wo hai ki main hi main hun

yan KHwesh-parasti hai apna hai na begana

mai hai ye KHudi meri masti mujhe KHud se hai

main aap hi saqi hun aur aap hi mai-KHana

gulzar mein main gul hun gul mein hun main bu ho kar

tuti ka main naghma hun bulbul ka hun afsana

har dam nae jalwe hain dam se mere 'alam mein

har aan nai meri har taur juda-gana

shahan-e-jahan mein main sau shan se hun 'ghausi'

rakhta hun faqiron mein sau rang faqirana