اک دم کوئی گر دیکھے وہ جلوۂ جانانہ

اک دم کوئی گر دیکھے وہ جلوۂ جانانہ

مجھ سا بنے دیوانہ مجھ سا رہے مستانہ

حالت پہ مری زاہد نادان تو ہنستا ہے

کچھ تجھ پہ اگر گزرے بن جائے گا دیوانہ

مستی کا مرے عالم وہ ہے کہ میں ہی میں ہوں

یاں خویش پرستی ہے اپنا ہے نہ بیگانہ

مے ہے یہ خودی میری مستی مجھے خود سے ہے

میں آپ ہی ساقی ہوں اور آپ ہی مے خانہ

گلزار میں میں گل ہوں گل میں ہوں میں بو ہو کر

طوطی کا میں نغمہ ہوں بلبل کا ہوں افسانہ

ہر دم نئے جلوے ہیں دم سے مرے عالم میں

ہر آن نئی میری ہر طور جدا گانہ

شاہان جہاں میں میں سو شان سے ہوں غوثیؔ

رکھتا ہوں فقیروں میں سو رنگ فقیرانہ