nur ho ja sham-e-ru-e-yar ka parwana ban

nuur ho jā sham-e-rū-e-yār kā parvāna ban

gar tujhe banñā ho kuchh to aql kho dīvāna ban

surma-e-ahl-e-nazar ban ho kisī kī ḳhāk-e-pā

mast banñā ho to chashm-e-mast kā mastāna ban

gar tujhe banñā ho kuchh to hech ban aur kuchh na ban

kyā kahūñ phir tujh ko maiñ kyā kyā tū ban kyā kyā na ban

go che daanā hai tū dānāyān-e-'ālam meñ magar

raah meñ dildār kī nādān ban daanā na ban

ek hai sab meñ to sab haiñ ek meñ pā ramz ko

Daal de hairat meñ sab ko aur tū hairat-kHāna ban

DhūñDh hai jin kī unhīñ ke hī tū kāshāna meñ hai

be-ḳhabar hushiyār ho ab un kā tū kāshāna ban

dekh phir us ke yagāna ban ke jalve aap meñ

yaar se ho jāygā na aap se begāna ban

sākinān-e-kū-e-jānāñ par ho qurbāñ jaan se

shaah banñā ho ġhulām-e-nargis-e-mastāna ban

raaz ābādī kā terī terī barbādī meñ hai

nīstī le phir to mir.āt-e-ruḳh-e-jānāna ban

phir sharāb-e-hastī-e-dildār kī mastī meñ rah

ruuh se ḳhum dil se shīsha jism se paimāna ban

ban ke paimāna se shīsha phir to shīsha se ho ḳhum

ḳhum se phir ho ḳhum-kade phir sāqī-e-ḳhum-ḳhāna ban

diid karnā ho to rū-e-yār kā ā.īna ho

sadqe honā ho to un ke gesuoñ kā shāna ban

gar tujhe banñā ho 'ġhausī' kuchh na ban ma.alūm ban

vo banā.eñ jab to phir tū jaan ban jaanā na ban

nur ho ja sham-e-ru-e-yar ka parwana ban

gar tujhe banna ho kuchh to aql kho diwana ban

surma-e-ahl-e-nazar ban ho kisi ki KHak-e-pa

mast banna ho to chashm-e-mast ka mastana ban

gar tujhe banna ho kuchh to hech ban aur kuchh na ban

kya kahun phir tujh ko main kya kya tu ban kya kya na ban

go che dana hai tu danayan-e-'alam mein magar

rah mein dildar ki nadan ban dana na ban

ek hai sab mein to sab hain ek mein pa ramz ko

Dal de hairat mein sab ko aur tu hairat-kHana ban

DhunDh hai jin ki unhin ke hi tu kashana mein hai

be-KHabar hushiyar ho ab un ka tu kashana ban

dekh phir us ke yagana ban ke jalwe aap mein

yar se ho jayga na aap se begana ban

sakinan-e-ku-e-jaanan par ho qurban jaan se

shah banna ho ghulam-e-nargis-e-mastana ban

raaz aabaadi ka teri teri barbaadi mein hai

nisti le phir to miraat-e-ruKH-e-jaanana ban

phir sharab-e-hasti-e-dildar ki masti mein rah

ruh se KHum dil se shisha jism se paimana ban

ban ke paimana se shisha phir to shisha se ho KHum

KHum se phir ho KHum-kade phir saqi-e-KHum-KHana ban

did karna ho to ru-e-yar ka aaina ho

sadqe hona ho to un ke gesuon ka shana ban

gar tujhe banna ho 'ghausi' kuchh na ban malum ban

wo banaen jab to phir tu jaan ban jaana na ban