مرے دل میں تم آئے دل کو میرے شاد کر ڈالا

مرے دل میں تم آئے دل کو میرے شاد کر ڈالا

رہو آباد تم، تم نے مجھے آباد کر ڈالا

خودی میں مر رہا تھا، دور تھا اپنی حقیقت سے

چھڑایا کیا مجھے خود سے، مجھے آزاد کر ڈالا

تمہارے ہاتھ مرد مٹنا ہے کیا؟ اک زندگانی ہے

ہوا آباد وہ، تم نے جسے برباد کر ڈالا

میں کیا تھا ایک صورت جس میں جان و دل نہ تن کچھ بھی

مری صورت میں کیا آئے مجھے آباد کر ڈالا

بڑی بندہ نوازی کی بڑا احسان کیا تم نے

جو بھولے سے بھی ہم بھولے ہوؤں کو یاد کر ڈالا

دیا ایماں اور ایماں لائے تھے ہم جن پر ان کو بھی

ہمیں تو آپ نے آباد ہی آباد کر ڈالا

نظر کیا مل گئی غوثیؔ کو وارفتہ کیا تم نے

میں صدقے آنکھوں آنکھوں ہی میں کیا ارشاد کر ڈالا