main aai saheli adam ke nagar se

maiñ aa.ī sahelī 'adam ke nagar se

vujūd-e-haqīqī ne laayā mujhe

'adam merī bastī meñ ho kar nahīñ thī

nahīñ se vo hai ne dikhāyā mujhe

maiñ mayyat maiñ jāhil maiñ muztar maiñ 'ājiz

maiñ bahrī maiñ andhī maiñ gūñgī azal se

vo zinda vo 'ālim murīd aur qādir

vo suntā hai biinā hai goyā maiñ sadqe

mirā mujh meñ kuchh bhī nahīñ hai sahelī

vahī sar se pā tak sañvārā mujhe

vahī terī sūrat se zāhir huā hai

ye murshid ne gar hai batāyā mujhe

maiñ kaise piyā ko ye bhūlūñ sahelī

jo hāthoñ se apne banāyā mujhe

mohammad kī sūrat se jalva dikhā kar

mire man-mohan ne lubhāyā mujhe

ḳhudā merā sāñchā nabī merā sāñchā

guru bhī milā hai to sāñchā mujhe

mujhī meñ ḳhudā ko mujhī meñ nabī ko

maiñ sadqe guru ke dikhāyā mujhe

usī se isī ko maiñ paatī huuñ 'ġhausī'

'ajab us ne jalva dikhāyā mujhe

main aai saheli 'adam ke nagar se

wujud-e-haqiqi ne laya mujhe

'adam meri basti mein ho kar nahin thi

nahin se wo hai ne dikhaya mujhe

main mayyat main jahil main muztar main 'ajiz

main bahri main andhi main gungi azal se

wo zinda wo 'alim murid aur qadir

wo sunta hai bina hai goya main sadqe

mera mujh mein kuchh bhi nahin hai saheli

wahi sar se pa tak sanwara mujhe

wahi teri surat se zahir hua hai

ye murshid ne gar hai bataya mujhe

main kaise piya ko ye bhulun saheli

jo hathon se apne banaya mujhe

mohammad ki surat se jalwa dikha kar

mere man-mohan ne lubhaya mujhe

KHuda mera sancha nabi mera sancha

guru bhi mila hai to sancha mujhe

mujhi mein KHuda ko mujhi mein nabi ko

main sadqe guru ke dikhaya mujhe

usi se isi ko main pati hun 'ghausi'

'ajab us ne jalwa dikhaya mujhe