KHuda maujud hai aur hum adam hain

ḳhudā maujūd hai aur ham adam haiñ

adam kyā maz.har-e-zāt-e-qadam haiñ

nahīñ haiñ ham vo aur vo ham nahīñ haiñ

tamāsha hai ki phir vo ham hī ham haiñ

nazar aate nahīñ gir ho ke zāhir

ye jalve kis ke phir ai zul-karam haiñ

jo kHokar ḳhud ko paa.e ḳhud meñ tujh ko

ilāhī ab to aise log kam haiñ

tirā dar chhoḌ kar jaa.eñ kidhar ham

jabīñ hai aur tire naqsh-e-qadam haiñ

piyeñge ham tire hāthoñ se saaqī

yahī sāġhar hamāre jām-e-jam haiñ

vahī zāhir vahī bātin hai 'ġhausī'

nahīñ jo chiiz kuchh vo chiiz ham haiñ

KHuda maujud hai aur hum adam hain

adam kya mazhar-e-zat-e-qadam hain

nahin hain hum wo aur wo hum nahin hain

tamasha hai ki phir wo hum hi hum hain

nazar aate nahin gir ho ke zahir

ye jalwe kis ke phir ai zul-karam hain

jo kHokar KHud ko pae KHud mein tujh ko

ilahi ab to aise log kam hain

tera dar chhoD kar jaen kidhar hum

jabin hai aur tere naqsh-e-qadam hain

piyenge hum tere hathon se saqi

yahi saghar hamare jam-e-jam hain

wahi zahir wahi baatin hai 'ghausi'

nahin jo chiz kuchh wo chiz hum hain