ye to bataen kaun hun yakta hai tu mana sahi

ye to batā.eñ kaun huuñ yaktā hai tū maanā sahī

tū hai mirā maulā sahī maiñ huuñ terā banda sahī

har-jā akelā tū hai gar sab kā kahāñ batlā guzar

be-do ke ik zāhir nahīñ maanā tū hai yaktā sahī

pūchhā maiñ ik kaisā hai tū bolā ki ik lākhoñ meñ huuñ

be-ik ke huuñ lākhoñ kahāñ go ek hai tanhā sahī

avval bhī tū āḳhir bhī tū zāhir bhī tū bātin bhī tū

ham kaun jab terā hī hai har-jā qad-e-ra.anā sahī

ham avval-o-āḳhir nahīñ ham batin-o-zāhir nahīñ

jab ham har ik sūrat nahīñ to sab terā jalva sahī

ḳhud asal huuñ na huuñ far.a meñ ḳhud shaḳhs huuñ na huuñ aks meñ

haañ asal tū to far.a meñ to shaḳhs meñ saayā sahī

maiñ kaun huuñ jo ain huuñ maiñ kaun huuñ jo ġhair huuñ

'ġhausī' vahī hai jalva-e-giriya parda ki parda sahī

ye to bataen kaun hun yakta hai tu mana sahi

tu hai mera maula sahi main hun tera banda sahi

har-ja akela tu hai gar sab ka kahan batla guzar

be-do ke ek zahir nahin mana tu hai yakta sahi

puchha main ek kaisa hai tu bola ki ek lakhon mein hun

be-ik ke hun lakhon kahan go ek hai tanha sahi

awwal bhi tu aaKHir bhi tu zahir bhi tu baatin bhi tu

hum kaun jab tera hi hai har-ja qad-e-rana sahi

hum awwal-o-aKHir nahin hum batin-o-zahir nahin

jab hum har ek surat nahin to sab tera jalwa sahi

KHud asal hun na hun fara mein KHud shaKHs hun na hun aks mein

han asal tu to fara mein to shaKHs mein saya sahi

main kaun hun jo ain hun main kaun hun jo ghair hun

'ghausi' wahi hai jalwa-e-giriya parda ki parda sahi