mujhko KHud se bhula diya kis ne

mujh ko ḳhud se bhulā diyā kis ne

un ko ḳhud meñ dikhā diyā kis ne

muddatoñ the talāsh meñ jis kī

kah ke kuchh ye milā diyā kis ne

ḳhud se chhūTe to pā liyā us ko

ye ishāra batā diyā kis ne

aañkh milte hī aa.e āñkhoñ meñ

un ko aisā dikhā diyā kis ne

dil meñ un ke sivā nahīñ koī

aisā dil meñ basā diyā kis ne

aañkh paḌtī hai jis taraf vo haiñ

yuuñ nazar meñ jamā diyā kis ne

mujh ko mujh se chhuḌā diyā dam meñ

jaam aisā pilā diyā kis ne

bhuul kar ḳhud ko ḳhvāb-e-ġhaflat meñ

so rahā thā jagā diyā kis ne

aaj kuchh aur hī haiñ ham 'ġhausī'

ham ko ham se milā diyā kis ne

mujh ko KHud se bhula diya kis ne

un ko KHud mein dikha diya kis ne

muddaton the talash mein jis ki

kah ke kuchh ye mila diya kis ne

KHud se chhuTe to pa liya us ko

ye ishaara bata diya kis ne

aankh milte hi aae aankhon mein

un ko aisa dikha diya kis ne

dil mein un ke siwa nahin koi

aisa dil mein basa diya kis ne

aankh paDti hai jis taraf wo hain

yun nazar mein jama diya kis ne

mujh ko mujh se chhuDa diya dam mein

jam aisa pila diya kis ne

bhul kar KHud ko KHwab-e-ghaflat mein

so raha tha jaga diya kis ne

aaj kuchh aur hi hain hum 'ghausi'

hum ko hum se mila diya kis ne