pahlu mein mere dil hai ahmad pe marne wala

pahlū meñ mere dil hai ahmad pe marne vaalā

aur dam mirā ye dam hai ahmad kā bharne vaalā

muztar ko chain aa.e be-kal qarār paa.e

dekhe jo zulf un kī koī bikharne vaalā

ahmad kā ishq chhoḌūñ kāfir nahīñ huuñ nāseh

turshī se ye nahīñ hai nashsha utarne vaalā

aatī thiiñ ye sadā.eñ vaqt-e-vilādat-e-shah

ab naḳhl-e-kufr kī hai ye jaḌ katarne vaalā

phir vār-e-teġh-e-furqat dil par lagā hai kaarī

ab zaḳhm-e-dil hai shāyad koī ubharne vaalā

isrā kī shab ye dete jibrīl the sadā.eñ

sardār-e-do-jahāñ hai is dam sañvarne vaalā

saare jahāñ kā sachchā hai qaul kā ye pakkā

jānāñ nahīñ ye apnā hargiz mukarne vaalā

ab yā nabī dikhā do rū-e-mubārak apnā

huuñ ishq meñ tumhāre jaañ se guzarne vaalā

jo dekh luuñ maiñ jalva maulā ke sadqe ho kar

'ġhausī' maiñ jaan apnī huuñ nazr karne vaalā

pahlu mein mere dil hai ahmad pe marne wala

aur dam mera ye dam hai ahmad ka bharne wala

muztar ko chain aae be-kal qarar pae

dekhe jo zulf un ki koi bikharne wala

ahmad ka ishq chhoDun kafir nahin hun naseh

turshi se ye nahin hai nashsha utarne wala

aati thin ye sadaen waqt-e-wiladat-e-shah

ab naKHl-e-kufr ki hai ye jaD katarne wala

phir war-e-tegh-e-furqat dil par laga hai kari

ab zaKHm-e-dil hai shayad koi ubharne wala

isra ki shab ye dete jibril the sadaen

sardar-e-do-jahan hai is dam sanwarne wala

sare jahan ka sachcha hai qaul ka ye pakka

jaanan nahin ye apna hargiz mukarne wala

ab ya nabi dikha do ru-e-mubarak apna

hun ishq mein tumhaare jaan se guzarne wala

jo dekh lun main jalwa maula ke sadqe ho kar

'ghausi' main jaan apni hun nazr karne wala