ghul hua dekh ke mahshar mein taDapna mera

ġhul huā dekh ke mahshar meñ taḌapnā merā

ishq-e-ahmad meñ huā haal tamāsha merā

ik jhalak dekhī hai sarkār ke jo jalve kī

aaj muusā kahīñ muñh takte haiñ kyā kyā merā

nok-e-mizhgān-e-mohammad kā ḳhayāl aayā hai

aaj chhalnī huā jaatā hai kaleja merā

huuñ vo pur-dard ki hai dard ko bhī dard mirā

aah rone pe mere rotā hai ronā merā

jaan to pahle nikalte hī ga.ī pesh-e-huzūr

pahuñchā taiba na rahā qabr meñ lāsha merā

hasrat-e-dīd-e-nabī meñ jo marā huuñ 'ġhausī'

sadqe hotī hai qazā dekh ke lāsha merā

ghul hua dekh ke mahshar mein taDapna mera

ishq-e-ahmad mein hua haal tamasha mera

ek jhalak dekhi hai sarkar ke jo jalwe ki

aaj musa kahin munh takte hain kya kya mera

nok-e-mizhgan-e-mohammad ka KHayal aaya hai

aaj chhalni hua jata hai kaleja mera

hun wo pur-dard ki hai dard ko bhi dard mera

aah rone pe mere rota hai rona mera

jaan to pahle nikalte hi gai pesh-e-huzur

pahuncha taiba na raha qabr mein lasha mera

hasrat-e-did-e-nabi mein jo mara hun 'ghausi'

sadqe hoti hai qaza dekh ke lasha mera